302 Nā Haʻawina

Auē, ua hiki koke wale mai nō ka hopena o ke kau. Eia nā mea i koe iā kākou:

Pōʻakahi 4/29

Ke Kūpale a Kumu Haʻalilio. 9:00 kakahiaka Moore 155A a i ʻole ma Zoom. (E nānā i ka hoʻolaha no kēia hanana.)

Pōʻakolu 5/1

Hōʻike Hope Loa. He māhele no nā analula i aʻo ʻia i kēia kau; he māhele no ke kāhulu pepeke; he unuhi (ma nā ʻano ʻelua); a he māhele haku.

Pōʻakolu 5/8

Pau ka Pepa Noiʻi Nūpepa - waiho ʻia i kāu faila haumāna ma mua o ka hola 4 o ka ʻauinalā. A, e hui nō kākou i ka hola 12:00 no ke kamaʻilio ʻana. E wehewehe mai ana ʻoukou i kā ʻoukou mau pepa noiʻi.

Eia kekahi haʻawina hoʻomaʻamaʻa no ke kāhulu pepeke. Inā hele ʻoe a huikau, e hoʻokaʻawale i nā māmala ʻōlelo ʻelua a ʻimi aku i ka piko/huli o loko. E hoʻokō nō ma mua o ka papa i ka pōʻakolu. A e hoʻomau nō i ka ʻimi noiʻi nūpepa!

Hū! He aʻo kāhulu pepeke nō! Eia kekahi haʻawina hoʻomaʻamaʻa - e hoʻokō aku ma mua o ka papa i ka Pōʻakahi.

Eia hoʻi, e hoʻomau i ka hana noiʻi nūpepa, a paʻa nā laʻana he 100 o ia huaʻōlelo hoʻokahi. I kēia pule nō kākou e hoʻopaʻa pono ai i nā koina o kēia papahana.

E hoʻomau i ka papahana noiʻi nūpepa, me ka waiho pū ʻana i kāu papa kuhikuhi (spreadsheet) ma kēia faila Google a kākou. E hoʻokomo pū aku i kēia mau kōlamu hou: ke kūlana o ka hua ʻōlelo; ka mea i kuhi ʻia; ka manaʻo; a me ke ʻano o ka palapala. Aia hoʻi he laʻana ma kēia papa kuhikuhi aʻu i hana ai no ka huaʻōlelo ʻo lena.

I ka Pōʻakolu, e hōʻoia ana kākou i ka holomua pono o kēia noiʻi. A laila, e hoʻomaʻamaʻa ana kākou i kekahi mea no ka pilina ʻōlelo. Mai hele ʻole mai!

Noiʻi Nūpepa.

E hoʻomau nō i ka ʻimi noiʻi no kāu waihoʻoluʻu, a loaʻa nā laʻana he 50 a ʻoi ma ka papa kuhikuhi. E hoʻokō aku ma mua o ka papa i ka Pōʻakahi.

Kūlana Huaʻōlelo.

I kamaʻāina kēia mau kūlana huaʻōlelo iā kākou, a hiki hoʻi ke kuhi aku i ke kūlana o nā huaʻōlelo waihoʻoluʻu i loaʻa ma nā nūpepa, e hoʻopau i kēia haʻawina ma mua o ka papa i ka Pōʻakahi.

‘Aʻohe papa i ka lā 3 a me ka lā 8 o ʻApelila!

Ma mua o ka papa i ka lā 10, e hoʻokō ʻia kēia mau mea:

1. E hoʻopau i ka hōʻiliʻili ʻana i nā huaʻōlelo waihoʻoluʻu mai loko mai o ka puke wehewehe ʻōlelo Hawaiʻi a hoʻokomo ʻia ma ka papa kuhikuhi nei.

2. E koho ka hui i waihoʻoluʻu laulā (red, yellow, green, a pēlā aku). ʻImi ʻia kēlā me kēia huaʻōlelo i loko o nā nūpepa Hawaiʻi kahiko e waiho lā ma papakilodatabase.com, a hoʻokomo ʻia ka heluna o ka loaʻa o kēlā me kēia anahulu makahiki ma ia papa kuhikuhi.

3. E koho ka haumāna i hoʻokahi hua ʻōlelo waihoʻoluʻu kikoʻī (ʻalaea, ʻelekū, lenalena, a pēlā aku), a me kekahi anahulu makahiki i puka pinepine ai kēia huaʻōlelo ma ka nūpepa.

4. E hana kope i kēia palapala template, e kiʻi aku i nā laʻana mai ke anahulu makahiki i koho ʻia, a e hoʻopihapiha. No ka manawa, e hoʻāʻo e kiʻi aku i nā laʻana he 50 a ʻoi; ma ka hopena o kēia papahana, e loaʻa ana he 100 laʻana.

Waiho ʻia nā mea a pau i loko o ka faila Noiʻi Nūpepa ma kā kākou Waihona Google. Inā kupu mai kahi nīnau, e leka uila mai, a e pane au i ka manawa e hiki ai. A hui hou i ka lā 10 o ʻApelila!

Eia hou nā ʻōkuhi no ka pepa e hoʻopau koke ai:

E hoʻomākaukau nō hoʻi i pepa no kēia Pōʻakahi aʻe. E koho ʻoe i hoʻokahi nīnau o lalo nei a pane aku, me ke kuhi pū ʻana i nā moʻolelo wahi pana a kākou i heluhelu iho nei. ʻElua ʻaoʻao ka lōʻihi o ka pepa, me ka lele ʻana o ka laina (double spaced). Hoʻokomo ʻia kāu pepa i loko o kāu Faila Haumāna ponoʻī ma mua o ka papa i ka Pōʻakahi. Eia nā nīnau:

• He aha ka mea waiwai o kekahi moʻolelo wahi pana? No ke aha e haʻi hou ʻia ai i kēlā me kēia hanauna?

• He mau mea kupaianaha i loko o kēia mau moʻolelo ʻelua. He aha ia mau mea kupaianaha a me nā hua (results) i loaʻa mai?

• He pilina anei ko kēia mau moʻolelo me kēia wā nei?

• E hoʻohālikelike aku i kekahi meʻe o kēia mau moʻolelo me kekahi meʻe ʻē aʻe i kamaʻāina iā ʻoe. Pehea i like ai lāua? Pehea i ʻokoʻa ai?

**Eia kekahi, e lawe mai i ka lolo uila paʻalima i ka Pōʻakahi, i hiki ke hoʻomaka ʻiʻo i ka ʻimi noiʻi huaʻōlelo!

Haʻi ʻŌlelo Uluwale: 3/27.

Ma ka Pōʻakolu nō ka haʻi ʻōlelo uluwale. E hāpai ʻia ana he mau nīnau no nā moʻolelo wahi pana o ʻUalakaʻa a me Kaumana. Lawe ʻoe i kāu nīnau, hoʻomākaukau iho, a haʻi ʻōlelo mai no kou mau manaʻo, he 2-3 minuke ka lōʻihi.

Pepa #1: 4/1.

E hoʻomākaukau nō hoʻi i pepa no kēia Pōʻakahi aʻe. E koho ʻoe i hoʻokahi nīnau o lalo nei a pane aku, me ke kuhi pū ʻana i nā moʻolelo wahi pana a kākou i heluhelu iho nei. ʻElua ʻaoʻao ka lōʻihi o ka pepa, me ka lele ʻana o ka laina (double spaced). Hoʻokomo ʻia kāu pepa i loko o kāu Faila Haumāna ponoʻī ma mua o ka papa i ka Pōʻakahi. Eia nā nīnau:

• He aha ka mea waiwai o kekahi moʻolelo wahi pana? No ke aha e haʻi hou ʻia ai i kēlā me kēia hanauna?

• He mau mea kupaianaha i loko o kēia mau moʻolelo ʻelua. He aha ia mau mea kupaianaha a me nā hua (results) i loaʻa mai?

• He pilina anei ko kēia mau moʻolelo me kēia wā nei?

• E hoʻohālikelike aku i kekahi meʻe o kēia mau moʻolelo me kekahi meʻe ʻē aʻe i kamaʻāina iā ʻoe. Pehea i like ai lāua? Pehea i ʻokoʻa ai?

Lana koʻu manaʻo i ko ʻoukou nanea maikaʻi ʻana i kēia pule hoʻomaha :)

Eia nā mea ʻelua e hana ai ma mua o ka papa i ka Pōʻakahi, lā 25 o Malaki:

• E hoʻoponopono i kāu paukū moʻolelo 3, me ka hoʻoikaika pū.

• E unuhi i ka moʻolelo no Kaumana, ke kupua i lilo i pōhaku. Eia kekahi template e hoʻohana ai, inā pēlā kou makemake.

I ka Pōʻakolu, lā 27 o Malaki e mālama ʻia ai nā haʻi ʻōlelo uluwale. E hele mai nō me ka mākaukau!

Eia nā māhele o ka hōʻike e hana ʻia i kēia Pōʻakolu:

• nā hua ʻōlelo hou (mai ka moʻolelo o ʻUalakaʻa)

• ka haku moʻolelo pōkole no kekahi kiʻi (me ka hoʻokomo pū ʻana i kekahi mau analula hou)

• ka unuhi ʻana (hoʻohui ʻia nā analula mai ka moʻolelo o ʻUalakaʻa a me nā analula mai ka Hōʻike #1. hoʻolako ʻia ka ʻōlelo haole; nāu e kākau i ka ʻōlelo Kanaka)

• ka unuhi ʻana paha i kekahi paukū pōkole i kākau ʻia ma ka ʻōlelo Hawaiʻi

Ma hope o ka wā hoʻomaha, e hana ʻia ka māhele haʻi ʻōlelo o nei hōʻike. Inā kupu mai he nīnau a he pilikia paha, e hoʻomaopopo koke mai!

Ua hoʻoholo ʻia nō ka mālama ʻana i ka Hōʻike ʻElua ma ka lā 13 o Malaki, ʻo ia hoʻi kēia Pōʻakolu aʻe. Eia kekahi haʻawina hoʻomaʻamaʻa e hoʻomākaukau ai kākou. E hoʻopihapiha, i hiki ke hoʻopaʻa ʻia aku ma ka Pōʻakahi.

Eia hoʻi, inā ʻaʻole i haku ʻia kāu Paukū Moʻolelo #3, e hana nō i kēia hopena pule a waiho aku ma loko o kāu Faila Haumāna ponoʻī ma mua o ka papa i ka Pōʻakahi.

E ho‘oma‘ama‘a kākou i nā analula hou e a‘o ‘ia nei! E koho aku nō i kekahi ki‘i ho‘okahi mai loko mai o kēia faila. E ‘imi aku nō i nā hua‘ōlelo i pili i ua ki‘i nei, a kikokiko ‘ia ma kekahi palapala Google. A laila, e haku i mo‘olelo no ke ki‘i āu i koho ai, a kikokiko ‘ia ma ka palapala Google like. 

Ke ‘olu‘olu, e waiho nō i kēia mo‘olelo (a me nā hua‘ōlelo) i loko o ka faila "Ha‘awina Kākau" i loko o kāu Faila Haumāna pono‘ī, ma mua ho‘i o ka papa i ka Pō‘akolu.