Nā Haʻawina 345

‘O kahi hana koe iā kākou, ʻo ia ka hoʻopuka ʻana i ka pukana mua o Ka Ulu Hoi. E nānā hou ka maka i kāu moʻolelo mua i haku ai; inā he wahi nīnau i koe, e hoʻopihapiha aku nō.

‘O ka Wehewehe MNP hoʻi kekahi haʻawina o ka papa i ka pōʻakolu. He loaʻa mai koe o ua moʻolelo nei, a hoʻolako ʻia ma ka ʻaoʻao kūpono o nei paena pūnaewele.

‘O ka hope loa nō, e hoʻoulu i manaʻo, i mau manaʻo paha no ke kumuhana o kāu papahana noiʻi nūpepa e hana ʻia i ka hopena o kēia kau. Kamaʻilio ʻia hoʻi i kēia papa e hiki mai ana. I mua a loaʻa ka lei o ka lanakila!

E kākau nō i kā piha o kāu moʻolelo KUH 2, a waiho ʻia i loko o ka faila Pukana 2, ma mua o ka papa i ka pōʻakahi. Eia hoʻi, e lawe mai nō i kāu puke kākau, i hōʻiliʻili ai au a heluhelu aku.

I kōkua no ka haku ʻana i nei moʻolelo nūpepa, ua waiho ʻia kekahi papa helu no nā loina kākau i hāpai ʻia i loko o ka papa. E nānā ka maka, a e komo paha nā mea kūpono i loko o kāu moʻolelo.

E wehewehe ʻia ana ka moʻolelo ʻo "Ka Ulana ʻAna" e Keanu; e heluhelu nō i ka moʻolelo ma mua o ka hele ʻana mai i ka papa. Aia nō ma ka ʻaoʻao Wehewehe MNP.

Eia hoʻi kākou ke eʻe mua nei i ke kākau moʻolelo ʻelua no Ka Ulu Hoi. A koho ʻia kāu wahi kumumanaʻo a pahuhopu hoʻi, e hoʻopaʻa i paukū hoʻokahi no ka wehewehe ʻana i ia moʻolelo holoʻokoʻa, a waiho ʻia ma kēia faila nei.

Na Kahā e wehewehe mai i keia moʻolelo nūpepa. Ma ka ʻaoʻao Wehewehe MNP e loaʻa ai. E heluhelu aku nō.

Eia hoʻi nā moʻolelo ʻē aʻe e heluhelu ai, no ka loli ʻana o ka ʻāina:

• Ikemaka, W.S.K. "One Kani Hou." Ka Hae Hawaii. 1 Iulai 1857, 4.

• "Mamina ke One Oiwi." Ka Lahui Hawaii. 14 Ianuali 1875, 2.

E hele mai nō me ka mākaukau no ka hāpai ʻana i nīnau paha, i nā loina kākau hoʻi i loaʻa mai ma ua mau moʻolelo nei.

E hoʻomākaukau no kā Kaiaka wehewehe ʻana i kāna moʻolelo nūpepa. Hiki ke loaʻa ma ka ʻaoʻao Wehewehe MNP o nei paena pūnaewele.

Eia hoʻi, inā ʻaʻole i pau ka haku hou ʻana a me ka hoʻoponopono ʻana i kāu moʻolelo mua no Ka Ulu Hoi, e hoʻopau koke! E alawiki mai nō!!

‘O ka lā kēia e pau ai kāu moʻolelo mua no Ka Ulu Hoi! E hoʻoikaika e like me nā manaʻo i hāʻawi ʻia e aʻu a me nā hoa papa. A e hoʻoponopono i nā hemahema. E puka auaneʻi nō!

Eia kekahi, ʻo ka Pōʻakahi kā Scubie lā e wehewehe mai ai i kekahi moʻolelo nūpepa. Ke loaʻa ia moʻolelo iaʻu, e hoʻouka ʻia ma kēia ʻaoʻao o ka paena pūnaewele nei. E heluhelu aku nō ma mua o ka papa, i kamaʻāina ʻē ka moʻolelo a me kona manaʻo iā kākou. A e lawe mai nō hoʻi i kāu Puke Moʻomanaʻo, kahi e kākau ʻia ai nā noka a me ka haʻawina a Scubie e hoʻolako mai ana. Mai poina!

‘O ka lā 23 o Kepakemapa (kēia pōʻakahi aʻe) ka lā e pau ai kāu moʻolelo mua no Ka Ulu Hoi. No laila, ʻo ka wā kēia e hoʻoholomua ai i ka moʻolelo, ma o ka haku hou, ka hoʻomōhala, a me ka hoʻoponopono. Inā ʻupu aʻe he nīnau, e hoʻopaʻa i hālāwai me aʻu ma calendly.com/kumukahi. Hiu nō a wela!

Eia hoʻi, e kākau inoa no kou lā wehewehe moʻolelo nūpepa, aia ma ʻaneʻi.

Eia nā mea e hana ai ma mua o ka hui ʻana i ka pōʻakahi:

• E hoʻopau i ka haku hou ʻana i ka paukū mua o kāu moʻolelo KUH, a waiho aku i ka palapala like o kāu kā mua. (Mai kiloi i ka mea mua i haku ʻia!)

• E heluhelu i nā paukū i haku ʻia e ʻekolu hoa papa. E heluhelu nō hoʻi i ka paukū i haku mua ʻia (ka original hoʻi). A laila, e hōʻike i ka mea kākau i kāu mea i makemake ai - ʻo ka mea mua paha, ʻo ka haku hou ʻana paha. Kikokiko ʻia ma ka palapala ma ke ʻano he comment ma ka ʻaoʻao.

• E hoʻomau nō i ka hoʻoikaika ʻana i kāu moʻolelo ponoʻī. Inā holo pono kēia leo hou, e lomilomi paha i ka moʻolelo holoʻokoʻa. Inā ʻaʻole, e ʻimi mau kāua i ala e mōhala pono ai ka moʻolelo a me kona leo kākau.

Eia nō ka hana e hoʻokō ai ma mua o ka hui hou ʻana o ka papa i ka lā 11 o Kepakemapa.

4 Kepakemapa.

E paʻa ke kumuhana o kāu moʻolelo mua no Ka Ulu Hoi. Hoʻomaka ʻia ka ʻimi noiʻi e pono ai a me ka hoʻoulu ʻana i ka ʻōlelo e hoʻopuka ai (nā huaʻōlelo kūpono, nā ʻōlelo noʻeau paha, a pēlā aku). A laila, hoʻopōkole ʻia ka moʻolelo holoʻokoʻa i loko o ka paukū hoʻokahi. Waiho ʻia kēia paukū ma kāu Faila Haumāna Google.

I kēia lā hoʻi, e hui ʻoukou ma nā hui liʻiliʻi i hoʻonohonoho ʻia penei. E heluhelu pū i nā paukū a ʻoukou i haku ai, a e kuhi aku i nā māhele o ka moʻolelo a ka mea kākau e hoʻomōhala ai, nā māhele paha i nele, a me nā māhele e kāpae ʻia paha. Hoʻokomo ʻia nō kēia mau manaʻo ma ke ʻano he comment ma luna o ia palapala Google hoʻokahi.

9 Kepakemapa.

Paʻa ke kā mua piha o kāu moʻolelo KUH. Waiho ʻia ma ke ʻano he palapala Google i loko o nei faila.

11 Kepakemapa.

E heluhelu a hoʻomaopopo i kēia moʻolelo nūpepa:

"Mamina ke One Oiwi." Ka Lahui Hawaii, 14 Ianuali 1875, 2.

E nānā hou i kēia hōʻikeʻike a me nā ʻano moʻolelo nūpepa like ʻole i loaʻa iā ia. A laila, e koho i hoʻokahi moʻolelo mai loko mai o ia pūʻulu, heluhelu aku i ka mea holoʻokoʻa, a kau ka manaʻo i ke ʻano i kākau ʻia ai ua moʻolelo nei. No ke aha i haku ʻia ai pēlā?

Eia hoʻi, mai poina ke kūʻai a me ka lawe pū ʻana mai i kāu Puke Moʻomanaʻo i ka papa.