top of page
img_2724---version-2_med_hr.jpeg

Nā Haʻawina 431

12 Mei 2023

Moʻolelo Hakuhia & Hoʻoponopono

Eia nā hana i koe no ka papa nei:

Moʻolelo Hakuhia. E pau ke kā hope i ka Pōʻalima, a paʻa ma kona ʻano e hiki. (Inā ʻo kēia moʻolelo kāu e hoʻoponopono ai no ka haʻawina ʻelua, ʻaʻole pono ka hoʻouna ʻana mai i kā hope.)


Hoʻoponopono / Paʻi Moʻolelo. E koho i kekahi moʻolelo āu i haku ai i kēia papa, e hoʻoponopono a hoʻopihapiha paha, i ʻane like ia me ka moʻolelo i paʻi ʻia no ka lehulehu. A paʻa, e hana i wikiō pōkole (2-3) minuke no ka wehewehe ʻana i kēia moʻolelo a me kāu hana hoʻoponopono. Waiho ʻia ka palapala a me ka wikiō i loko o kēia faila ma mua o ka hola 4:00 o ka lā 12 o Mei.


Eia kekahi, mai poina ka hoʻopihapiha ʻana i nā palapala loiloi papa. Mahalo! A hui hou kākou!!

28 ʻApelila 2023

Moʻolelo Hakuhia (hoʻomau)

E lākou nei, mahalo i ka ʻae ʻana mai e hoʻopaneʻe aku i kā kākou papa. I ka hola 9-10:15 kākou e hui ai i kēia Pōʻalima, ma ka Zui maʻamau. A, e hoʻomau nō kākou i ka hoʻoponopono a me ka hoʻomōhala ʻana i nā moʻolelo hakuhia a ʻoukou.

26 ʻApelila 2023

Moʻolelo Hakuhia

Hoihoi nā moʻolelo e haku ʻia nei! E heluhelu ana au i nā ʻolokeʻa i loaʻa, a hāʻawi manaʻo. ʻO ʻoukou hoʻi, e haku i ke kā mua piha o kāu moʻolelo ponoʻī, a waiho akula i kēia faila ma mua o ka papa i ka Pōʻakolu. Mai poina, ʻano pōkole nā ʻaoʻao, ma kahi o ka ʻelima. No laila, mai hoʻonui hana a hoʻopihapiha wale!

21 ʻApelila 2023

Moʻolelo Hakuhia

Nui ka waiwai a me ka leʻaleʻa o ke kamaʻilio ma ka papa i nei lā! Mahalo iā ʻoukou! No ka Pōʻalima, e hoʻopaʻa i ʻolokeʻa (outline) o kāu moʻolelo hakuhia, a waiho aku ma ʻaneʻi. Inā hiki, e haku nō hoʻi i ka hoʻomaka ʻana o ua moʻolelo nei, i ʻike mākou i ke ʻano o ka moʻolelo āu e noʻonoʻo ana.

12-14 ʻApelila 2023

Mele & Moʻolelo

E lākou nei, he pani hakahaka nō i kēia Pōʻakolu 4/12. E nānā i kaʻu leka uila i loaʻa ka loua a me ka ʻike e pono ai.


A hui hou kākou i ka lā 19 o ʻApelila, a kamaʻilio pū no ka moʻolelo hakuhia a ʻoukou e hana ai.

5 ʻApelila 2023

Haʻi Moʻolelo / Kākau Manaʻo

‘Elua haʻawina e hoʻokō ai no ka Pōʻakolu:

  • E hoʻomaʻamaʻa i ka haʻi waha ʻana i kāu moʻolelo wahi pana e haku hou nei. E haʻi ʻia ana nō ma loko o ka papa i ka Pōʻakolu.

  • E hana i Kākau Manaʻo a waiho ʻia ma kāu faila ponoʻī, penei:


  • Inā ua komo ʻoe i ka papa Zumi ma Ānuenue, e kākau i manaʻo no nā moʻolelo i haʻi waha ʻia - nā mea hoihoi, nā haʻawina o laila, a pēlā aku.

  • Inā ʻaʻole ʻoe ma ia papa, e kākau i manaʻo no kāu hoʻopaʻa ʻana i ka moʻolelo no ka haʻi waha ʻana.

24 Malaki 2023

MWP / Kūpale Laeoʻo

E hoʻomau nō kākou i ke kamaʻilio no nā kā mua o ka Moʻolelo Wahi Pana. Eia hoʻi, e hoʻokuʻu koke ʻia ana nō ka papa, i naue like ai kākou i ke kūpale laeoʻo a Kaimana Kawaha. Aia ana ma Webster 104, hola 12:00, a ma ka Zumi pū kekahi.

22 Malaki 2023

Moʻolelo Wahi Pana: Kā Mua

Aia ma ʻaneʻi kekahi papa kuhikuhi no nā māhele o ka moʻolelo a me nā ʻano i kākau ʻia ai e ka poʻe ma mua. E heluhelu nō, i kōkua paha no kāu kākau moʻolelo ponoʻī. Ma mua o ka papa i ka Pōʻakolu, e paʻa kekahi kā mua o kāu moʻolelo wahi pana, a waiho ʻia i ka faila i noa i ka papa.

10 Malaki 2023

Haku Wehena

‘Eiʻa kekahi papa kuhikuhi no nā ʻano like ʻole e hoʻomaka ai kekahi moʻolelo wahi pana. E heluhelu aku nō, a e kau ka manaʻo i nā mea i kamaʻilio ʻia ma ka papa nei. A laila, e hoʻāʻo ʻoe i ‘elua ʻano wehena no ka hoʻomaka ʻana o kāu moʻolelo wahi pana ponoʻī. ʻAʻole lōʻihi loa kēia mau wehena; he paukū pōkole hoʻi. Ke paʻa, e waiho ʻia ma ka faila Moʻolelo Wahi Pana i noa i ka papa holoʻokoʻa.

3 & 8 Malaki 2023

Kū i ka Māna / Moʻolelo Wahi Pana

E lākou nei, e hoʻokuʻu ʻia ana ka papa i ka Pōʻalima, lā 3 o Malaki. E hele nui ʻoukou i ka hoʻolauna mēkia ʻōlelo Hawaiʻi!


I kēia pule nō, e hoʻopaʻa pono i kāu moʻolelo wahi pana e haʻi hou aku ai. Ma ka faila Nā Moʻolelo Wahi Pana, e hoʻokomo nō hoʻi i loua (link) no kāu moʻolelo kumu e heluhelu ana. Inā he mau moʻolelo kumu, e hoʻokomo nō i nā mea a pau i loaʻa iā ʻoe.


A pau ka heluhelu pono ʻana, e hoʻomākaukau i iwi moʻolelo (he ʻano outline) no nā mea nui e kupu ana i loko ona. Waiho ʻia kēia palapala ma kēia faila Google, ma mua o ka papa i ka Pōʻakolu.

1 Malaki 2023

Moʻolelo Wahi Pana - koho ʻia

‘O ka haʻi hou ʻana i moʻolelo wahi pana kahiko ka papahana ʻelua o nei kau. I kēia pule, e koho aku nō i kāu moʻolelo e haʻi hou ai, a e hoʻomaka i ka heluhelu a me ka hoʻopaʻa ʻana i ka iwi o ua moʻolelo nei. Aia ma kēia palapala kahi e hōʻike mai ai i ka moʻolelo āu i koho ai. Ma laila nō hoʻi kekahi mau kumu ʻike a me ka wehewehe pōkole ʻana i ke kaʻina hana o nei papahana.

24 Pepeluali 2023

Hōʻikeʻike Noiʻi Moʻolelo / Kākau Manaʻo

Auē kēia mau moʻolelo nui o ka hoihoi a me ka waiwai! E hoʻomau ʻia nō ka hōʻikeʻike ʻana i nā momi o loko i kēia Pōʻalima.


Eia hoʻi, e pane i kēia nīnau ma ke ʻano he haʻawina Kākau Manaʻo. Piha ka hapa ʻaoʻao a ʻoi iki aʻe paha, a waiho ʻia i kāu faila Kākau Manaʻo ma mua o ka papa i ka Pōʻalima. Eia ka nīnau:

He aha kekahi (mau) kuleana o ka mea kākau moʻolelo kahiko, a pehea i kō ia kuleana i ka mea kākau o kāu kaʻao e heluhelu nei?

22 Pepeluali 2023

Hōʻikeʻike Noiʻi Moʻolelo #1

Ke ʻoluʻolu, e hoʻomākaukau i wahi hōʻikeʻike no kekahi (mau) mea hoihoi i loaʻa iā ʻoe ma loko o ka moʻolelo āu e heluhelu nei. He 8-10 minuke ka lōʻihi o kou wā hōʻikeʻike; e hoʻolilo aku e like me kāu e manaʻo ai he pono. ʻO ka mea nui, e aʻo mai paha i kekahi mea iā mākou, i kōkua no ka haku ʻana i mau moʻolelo hoihoi nona ka leo Hawaiʻi kūpaʻa. Eia hoʻi, mai poina ka waiho ʻana i ia mau momi ma ka faila Noiʻi Moʻolelo ma loko o ka waihona Google a kākou.

17 Pepeluali 2023

Moʻolelo Wahi Pana

‘Akahi ka nani o nā Puke Kamaliʻi i haku ʻia iho nei!! Mahalo e nā mea kākau moʻolelo.


I ka Pōʻalima, e hoʻomaka kākou i kekahi mokuna hou o ka papa, no ka haʻi hou ʻana i kekahi moʻolelo wahi pana kahiko. I mea e holo pono ai ke kamaʻilio, e heluhelu mua i kēia moʻolelo nūpepa, "He wahi kaao," a e noʻonoʻo hoʻi no nā kuleana a me nā pahuhopu o ka haʻi hou ʻana i kekahi moʻolelo kahiko e like me kēia.

15 Pepeluali 2023

Puke Kamaliʻi - pau!

E hoʻopau nō i ke kā hope o kāu Puke Kamaliʻi, pau pū hoʻi me kona mau kiʻi. A, e mākaukau hoʻi no ka heluhelu ʻana mai i mua o ka papa.

10 Pepeluali 2023

Puke Kamaliʻi - Ana Moʻolelo

E kala mai i koʻu māʻopaʻopa ʻana mai. Eia kahi e loaʻa ai ke ana moʻolelo no ka Puke Kamaliʻi. E hoʻopihapiha aku nō no ka moʻolelo a kekahi o nā hoa papa e haku nei. A, mai poina ka hoʻoikaika hou ʻana i kāu puke, a me ke kaha ʻana i mau kiʻi e pono ai ʻo ia. (Lawa nā kiʻi maʻalahi o ke kaha ʻana aku - ʻo ka mea nui ka ʻike ʻia ʻana o kou manaʻo ma laila.)

8 Pepeluali 2023

Puke Kamaliʻi - Haku ʻia!

E paʻa nō ke kā mua o kāu Puke Kamaliʻi, a waiho ʻia i loko o ka faila Puke Kamaliʻi i noa iā kākou! ʻO nā kā mua i loaʻa ʻē mai, e waiho ana au i koʻu mau manaʻo no ua mau moʻolelo nei, a e hoʻihoʻi ʻia ana i loko o kā ʻoukou mau faila haumāna ponoʻī. E nānā aku nō, a e hoʻoponopono i ka moʻolelo ma mua o ka hui ʻana i ka Pōʻakolu.


Eia kekahi, e heluhelu i ka moʻolelo a kekahi haumāna i kākau ai, a waiho i kou mau manaʻo, nīnau, a pēlā aku ma ke ʻano he comment ma ka ʻaoʻao. He kōkua ia no ua mau haumāna nei, a he māhele nō hoʻi no kāu kaha :)


No ka Pōʻalima, lā 10 o Pepeluali - e mālama ʻia nō ka papa ma ka Zumi maʻamau. Paipai naʻe au iā ʻoukou e hele kino aku i ka Lā Launa Pū. I laila ana kēia ma mua a ma hope paha o kā kākou papa.

3 Pepeluali 2023

Puke Kamaliʻi - kā mua / hoʻoulu manaʻo

Ua hiki mai nō ka wā!


Inā mākaukau ʻoe no ka hoʻomaka ʻana i ka haku puke kamaliʻi, e hoʻomaka nō. Ma kāu faila, e hōʻike mai nō hoʻi i kahi e kaʻawale ai nā ʻaoʻao - no ka puke, e pahā hoʻi ka huina nui o nā ʻaoʻao ona, me ka helu pū ʻana i ka ʻili o ka puke (ʻo mua me hope).


Inā paha i hiki ʻole i kahi e mākaukau loa ai no ka haku puke, e hoʻomau nō i ka hoʻoulu manaʻo. A, ma ka palapala like o ka puaʻi manaʻo mua, e wehewehe i kēia mau mea ʻelua:

  • nā hemahema āu e mahuʻi ana, a me nā ʻōlelo/hoʻoponopono e loaʻa ana ma loko o ka puke

  • nā loina Hawaiʻi e lilo ana i kahua no kāu puke

Waiho ʻia ma ka faila Puke Kamaliʻi i noa i ka papa, ke ʻoluʻolu.

1 Pepeluali 2023

Hoʻolālā Puke Kamaliʻi

Eia kekahi mau puke hou aku e heluhelu ai i kēia pule, aia ma noeau.org/napuke:

  • ‘Oiai au e hiamoe ana

  • I nehinei, aia ka moa ma kahi o...


‘O ka mea nui naʻe, e hoʻomaka i ka hoʻolālā ʻana i kāu puke ponoʻī e haku ai. He aha kona moʻolelo a me kona mau meʻe? E aʻo ʻia ana kekahi analula? No ka pae hea ia? He aha nā mea ʻē aʻe e aʻo ʻia ma o ia puke? E kiloi aku nō i kou mau manaʻo ma kekahi palapala Google, a waiho ʻia i ka faila Puke Kamaliʻi i noa i ka papa. **ʻAʻole kēia he kā (draft) o kāu puke - he wehewehe wale nō i kou mau manaʻo no ua puke nei.

27 Ianuali 2023

Nā Puke Kamaliʻi (0-3)

Ua waiho ʻia ʻekolu puke kamaliʻi ma kā kākou Waihona Google. E heluhelu aku nō i ia mau puke, a me kēia mau puke a Noʻeau Warner i haku ai. Hiki ke loaʻa ua mau puke nei ma noʻeau.org/napuke.

  • He aha ka inoa o kēia manu?

  • He aha ka iʻa nona kēia hiʻu?

  • Ua lele ka lupe i luna

A laila, e waiho i Pepa Kākau Manaʻo ma kāu faila haumāna. Ma ua pepa nei, e koho i hoʻokahi puke āu i heluhelu ai, a e wehewehe mai i kona pahuhopu nui, nā ʻano mea i hoʻokō i ua pahuhopu nei, a me nā mea waiwai ʻē aʻe āu i ʻike aku ai ma ia puke hoʻokahi. Inā he manaʻo loiloi a he nīnau paha, e hāpai aku nō i loko o kēia pepa. He ½ - 1 ʻaoʻao ka lōʻihi.

bottom of page