Nā Haʻawina 604

25 ʻApelila

‘Aʻohe papa. E hoʻomau i ka haku pepa ʻana.

2 Mei

Ka lā hope loa o ka papa. E waiho i kahi māhele hou o ka pepa ma ka DB ma mua o ka hui ʻana. E hoʻomākaukau ana nō hoʻi kākou no ka hālāwai hoʻolauna me nā polopeka.

9 Mei 2:15-4:30 ʻaui

I Hui ke Kalo me ka ʻOhā - he hālāwai hoʻolauna me nā polopeka. E haʻi ʻōlelo kēlā me kēia haumāna no ka 10 minuke: wehewehe ʻia ka papahana laeoʻo i manaʻo ʻia. A laila, he wā e hāpai ai nā kumu i mau nīnau, a kamaʻilio pū kākou.

13 Mei 4:00 ʻaui

Pau ka palapala noi laeoʻo a me ka papa hōʻuluʻulu kumu ʻike, a hoʻokomo ʻia ma ka DB o Laulima.

Ua paʻa kekahi kā o ka hoʻolauna kumumanaʻo o kāu papahana noiʻi. I kēia pule, e hoʻomau i ka haku ʻana i kekahi māhele ʻē aʻe o kāu pepa, a i ʻole i ka haku hou ʻana i ka māhele hoʻolauna. Eia hou nā māhele e pono ai ka palapala noi:

• nā mea i kākau ʻē ʻia no kāu kumumanaʻo (literature review)

• kāu mea hou e waiho ai no ka lehulehu

• ke kiʻina hana (methodology: how you will do your research and analysis/project)

• nā māhele o ka papahana (inā he papahana B kāu, ma ʻaneʻi e wehewehe ai i ke ʻano o ka hua e loaʻa mai ana, a me nā māhele ona)

Waiho ʻia kēia māhele i loko o ka DB ma mua o ka papa i ka Pōʻakahi.

Eia kekahi, e heluhelu aku i ka palapala noi holoʻokoʻa a Ākea Kahikina, aia ma ka ʻaoʻao Kumu ʻIke o nei paena pūnaewele.

E kākau mua i ka māhele hoʻolauna papahana o kāu palapala noi. Ma ʻaneʻi e hoʻokahua ʻia ai kāu papahana, a wehewehe pono ʻia kona kumu, kona pahuhopu, a me kāu hoʻohiki i ka mea heluhelu. Aia iā ʻoe ke kaʻina o nā manaʻo a me ke ʻano e hoʻākāka ʻia mai ai. Waiho ʻia ma ka DB ma mua o ka papa i ka Pōʻakahi.

Eia kekahi, e heluhelu pau i ke noi a Kaimana Chock.

E heluhelu mai i kā Kumu Kaʻiu palapala noiʻi laeoʻo, ma ʻaneʻi:

Damas, Frank Ezra Kaiuokalani. Pale ʻO Luna, Pale ʻO Lalo: He Kālailaina i Nā Hiʻohiʻona Hoʻopāpā i Paʻa ma ka Moʻolelo Hawaiʻi o Kalapana a me nā Mana Moʻolelo e Pili Pū Ana. Palapala Noiʻi Laeoʻo. Ke Kulanui o Hawaiʻi i Mānoa, 2017.

Na Kahikinaokalā e alakaʻi mai i ka papa. ʻO nā haumāna ʻē aʻe, e waiho nō i kāu pepa Hāpai Manaʻo ma Laulima i ka pō Lāpule.

Eia ka palapala laeoʻo e heluhelu ai no ka lā 21 o Malaki. Na Maka e alakaʻi mai i kā kākou kamaʻilio ʻana.

Kahaunaele, Donna Kainaniokalihiwai. He Kamaʻāina Au no Kahelelani, He Kupa no ka Lā Welo i Lehua: He Noiʻina Mele Niʻihau. Palapala Noiʻi Laeoʻo. Ke Kulanui o Hawaiʻi i Hilo, 2013.

**ʻAʻohe kula i kēia pule aʻe - ʻo ka wā hoʻomaha kupulau ia! Ke ʻoluʻolu, e hoʻomaopopo aku i nā haʻawina i hala, a e hoʻopau. He keu nō ka papa hōʻuluʻulu kūmole - inā loaʻa ʻole kekahi kā iaʻu, e waiho aku nō ma ka Dropbox i kēia pule.

Eia ka palapala noiʻi a kākou e heluhelu ai i kēia pule:

Au, Uʻilani. No Nā Loina Kākau O J.W.H. Kauahi: He Papahana Hoʻopilipili Kākau. Palapala Noiʻi Laeoʻo. Ke Kulanui o Hawaiʻi i Mānoa, 2018.

Na Makia e alakaʻi i ka papa i ka lā 7. Ke ʻoluʻolu, e waiho i kāu Kākau Manaʻo ma ka Papa Kūkā o Laulima i ka pō Lāpule, i hiki iā ia ke hoʻomākaukau.

Eia ka palapala noiʻi laeoʻo e heluhelu ai i kēia pule:

Lorenzo-Elarco, Jacob Hauʻoli Ikaika Poʻokela. Heleleʻi ka Ua Lilinoe, Ola ka Honua: He Papahana ʻImi Noiʻi a Kālailai Hoʻi no ka Mea Kākau Nūpepa ʻo J.W.K. Kaualilinoe. Palapala Noiʻi Laeoʻo. Ke Kulanui o Hawaiʻi ma Mānoa, 2021.

Ke pau i ka heluhelu ʻia, e hoʻomākaukau i kahi pepa liʻiliʻi. Hōʻike ʻia maila kekahi manaʻo i ʻupu aʻela i kou heluhelu ʻana, kekahi mau nīnau paha, a me ka waiwai nui o kēia papahana noiʻi. Waiho ʻia ma ka Papa Kūkā i Laulima i ka pō Lāpule, a e heluhelu aku i nā manaʻo o nā hoa papa inā hiki.

Papa Hōʻuluʻulu Kūmole

Eia kekahi, e hoʻomākaukau i kā mua no kāu papa hōʻuluʻulu kūmole (Annotated Bibliography). ʻImi ʻia a loaʻa ma kahi o ʻumi kumu ʻike. Loaʻa ke kuhikuhina (Chicago/Turabian), kahi wehewehe pōkole ʻana i ka manaʻo nui o ia kumu ʻike, a me ka pilina i kāu pepa ponoʻī. Waiho ʻia ma ka DB o Laulima ma mua o ka papa i ka Pōʻakahi.

Eia ka palapala noiʻi laeoʻo e heluhelu ai i kēia pule:

Ezell, John Thomas Jr. E Hoʻi i ka Piko – Nā Piko ʻEhā – I Piko Hou no nā Piko ʻEkolu. Palapala Noiʻi Laeoʻo. Ke Kulanui o Hawaiʻi i Mānoa, 2019.

Ke pau i ka heluhelu ʻia, e hoʻomākaukau i kahi pepa liʻiliʻi. Hōʻike ʻia maila kekahi manaʻo i ʻupu aʻela i kou heluhelu ʻana, kekahi mau nīnau paha, a me ka waiwai nui o kēia papahana noiʻi. Waiho ʻia ma ka Papa Kūkā i Laulima i ka pō Lāpule, a e heluhelu aku i nā manaʻo o nā hoa papa inā hiki.

ʻElua mea e paʻa no kēia pule aʻe:

Hāpai Kumumanaʻo

E wehewehe pono mai i ke kumumanaʻo o kāu papahana noiʻi: ka pahuhopu, kāu mea e hana ai, kāu mea hoʻi e ʻimi noiʻi ai. Me he lā, ʻo kēia ka wehewehe pōkole i kāu papahana. He paukū hoʻokahi nō.

Papa Hōʻuluʻulu Kūmole

‘Imi ʻia a loaʻa ka 5 a ʻoi kumu ʻike no kāu papahana - nā mea hoʻi i kākau ʻē ʻia no ia kumumanaʻo. (Lit Review, not new data) Helu papa ʻia me ka citation ma luna, a laila he paukū e hōʻike mai ana i ka manaʻo nui ona a me ka pilina i kāu papahana ponoʻī.

Waiho ʻia nā mea ʻelua ma ka DB ma mua o ka papa i ka Pōʻakahi.

I mea e paʻa pono ai ke kumumanaʻo o ka pepa noiʻi laeoʻo, e hoʻomaka i ka ʻimi ʻana i ʻike no ia kumumanaʻo nui - ʻo ka haku moʻolelo paha, ka heʻenalu paha, ka like o ka ʻōlelo Hawaiʻi me ka ʻōlelo Kahiki, ka mele ʻia ʻana o ke mele e ka mānaleo, ke kākāʻōlelo paha, a pēlā aku. Ke ʻimi ʻia nei nō nā mea i kākau ʻē ʻia no kēia kumumanaʻo - ʻaʻole kēia ʻo kāu noiʻi ʻana e loaʻa ai ka ʻike hou. Hōʻiliʻili ʻia kekahi mau kumuʻike (e hoʻāʻo e loaʻa ka 5), a heluhelu liʻiliʻi ʻia. Ke hui kākou, e kamaʻilio pū no ka mōhala ʻana mai o kou mau manaʻo.

Ua koho ʻia ʻekolu palapala noiʻi e kēlā me kēia haumāna. E heluhelu aku i ka hōʻuluʻulu a me ka mokuna o ka pepa e wehewehe ana i kona kumumanaʻo a me kona pahuhopu. I ka papa, e wehewehe mai i nā manaʻo nui o ia mau pepa ʻekolu i mua o ka papa. Eia ka pahuhopu o kēia haʻawina, he kōkua ia i ka paʻa (koke?) ʻana paha o kā ʻoukou mau kumuhana noiʻi laeoʻo. Eia kekahi, e mākaukau no ke koho ʻana i kou lā e alakaʻi ai i ka papa (e nānā i ka ʻolokeʻa) a me ka palapala a kākou e heluhelu ai no ia la. A e hoʻomaka i ka hōʻiliʻili ʻana i nā kumu ʻike e piha ai kāu papa hōʻulu kūmole. ʻAʻOHE KULA I KA LĀ 17 O IANUALI. A HUI HOU KĀKOU I KA LĀ 24!