Nā Haʻawina 604

E lākou nei, ʻaʻole nō he papa i ka lā 17 o ʻApelila. E hoʻokō aku i nā mea e pono ai kēia papa a me kāu mau kuleana haumāna.

Ma hope aku, ʻelua wale nō papa i koe, no ka hoʻomōhala ʻana i kāu palapala noi laeoʻo a me ka hoʻomākaukau ʻana no ka launa pū ʻana me kahi poʻe polopeka. No ka lā 24, e koho i māhele o kāu palapala (mai loko mai paha o ka palapala i hoʻolako ʻia ma ʻaneʻi), a e haku nō. E waiho ʻia ka faila nei ma mua o ka papa, i kamaʻilio pū ʻia.

**Inā he haumāna ʻoe no waho mai o Kawaihuelani, e hoʻopaʻa i wā e kamaʻilio ai kāua no kāu palapala e hana nei: calendly.com/kumukahi

‘O ka palapala noi hope loa kēia a kākou e heluhelu ai i kēia kau, ʻo ia hoʻi kā Kama Kaaikaula. Eia kekahi, e hoʻonui i kāu Papa Hōʻuluʻulu Kūmole, i loaʻa ka 10-15 kumu ʻike i hōʻuluʻulu ʻia. Hiki ke pakuʻi wale aku i ka palapala like.

Auē, poina iho nei iaʻu ka lā nui o kēia Pōʻakahi aʻe! E hoʻolauleʻa i ka lā Kūhiō, a e hoʻomaha kākou i ka hele kula ʻana!

No ka lā 3 o ʻApelila, e heluhelu nō i ka Palapala noi a Ākea Kahikina. E kākau manaʻo hoʻi no ka pilikia/hemahema āu e hoʻoponopono ai ma o kāu palapala noiʻi ponoʻī. E hoʻopaneʻe kākou i ka heluhelu ʻana i kā Kaʻaikaula pepa a me ka hoʻopihapiha Papa Hōʻuluʻulu Kūmole a i ka lā 10 o ʻApelila. Mahalo!

Eia hou nā laʻana o ka Papa Hōʻuluʻulu Kūmole a me ka loua e kiʻi ai i ke kaila kuhikuhi kumu ʻike ʻo ka Chicago-Turabian. E hōʻiliʻili aku i nā kūmole e pono ai kāu pepa noi (a pepa noiʻi paha), a e helu papa aku i like me kēia kaila kuhikuhi. E hōʻuluʻulu nō hoʻi i nā manaʻo nui o ʻelima o ua mau kumu ʻike nei, me ka pilina paha i kāu papahana ponoʻī. Waiho ʻia kēia mau palapala ma kēia faila ma mua o ka papa i ka lā 20 o Malaki.

I ia lā nō hoʻi, e kamaiʻilio kākou no kā Shishido Palapala Noi Laeoʻo. E hoʻomākaukau i mau manaʻo a nīnau paha no ke kūkulu ʻana i kēia ʻano palapala.

**He wā hoʻomaha kēia pule aʻe - e hoʻomaha nō!

Eia ka palapala laeoʻo e heluhelu ai no kēia pule:

Kawaiʻaeʻa-Harris, Diane Kanoelani. Ka Nohona ma Kaupō ma Waena o ka Makahiki 1930-1950. Palapala Noiʻi Laeoʻo. Ke Kulanui o Hawaiʻi ma Hilo, 2013.

Na Kapaiaʻala e alakaʻi i kā kākou papa i ka Pōʻakahi. E like me ka mau, e waiho aku i nā pepa Hāpai Manaʻo ma ka faila kūpono ma mua o ka pō Lāpule.

I ia pule aʻe, e hoʻomākaukau ana ʻoukou i māhele o ka Papa Hōʻuluʻulu Kūmole. He wā kūpono paha kēia e hōʻiliʻili ai i nā kumu ʻike āu e hoʻohana aku ai ma kāu pepa noi laeoʻo.

Eia kā Kainani Kahaunaele pepa i kākau ai. E heluhelu no ka lā 27 (ʻaʻohe kula i ka lā 20!!), a waiho ʻia kāu pepa Hāpai Manaʻo ma ka waihona Google i ka pō Lāpule.

• Kahaunaele, Donna Kainaniokalihiwai. He Kamaʻāina Au no Kahelelani, He Kupa no ka Lā Welo i Lehua: He Noiʻina Mele Niʻihau. Palapala Noiʻi Laeoʻo. Ke Kulanui o Hawaiʻi i Hilo, 2013.

Eia kekahi, e haku i ʻōlelo hoʻohiki no kāu pepa ponoʻī e kākau ai no kēia papa. No ka hapanui o ʻoukou, ʻo ia ana nō ka Pepa Noi Laeoʻo; no kekahi hapa hoʻi, he māhele paha ia no kāu Pepa Noiʻi maoli. Eia nā laʻana i loaʻa mai nā pepa i heluhelu ʻia iho nei. Ma ka waihona Google nō e hoʻokomo aku ai.

E heluhelu mai i kā Leilani Basham palapala, penei:

Basham, J.J. Leilani. He Puke Mele Lāhui: Nā Mele Kūpaʻa, Nā Mele Kūʻē a me Nā Mele Aloha o Nā Kānaka Maoli. Palapala Noiʻi Laeoʻo. Ke Kulanui o Hawaiʻi i Mānoa, 2002.

A laila, e waiho ʻia kāu Hāpai Manaʻo ma ka faila kūpono o kā kākou Waihona Google ma ka pō Lāpule. Na Hoaloha nō hoʻi e alakaʻi mai i kā kākou kamaʻilio ʻana i ka papa.

Eia ka mea e heluhelu ai i kēia pule:

Shishido, Beau Makanamakamae. He Aha Hoʻi ka Mea ʻo ka Hele Hoʻokahi ʻAna, I Hele ʻOe, Hele me ou mau Kūpuna. Pepa Noiʻi Laeoʻo. Ke Kulanui o Hawaiʻi i Mānoa, 2020.

Na Keleka e alakaʻi i ka papa a me ke kamaʻilio ʻana o kākou. I kōkua iā ia, e hoʻokomo i kāu pepa Hāpai Manaʻo #2 ma ka faila kūpono i ka pō Lāpule. No kēia hanana, hiki iā ʻoe ke koho i ke kākau wale ʻana i pepa, a i ʻole i ka hoʻopihapiha ʻana i ka palapala Haʻawina & Hoʻokō. 

No kēia pule aʻe, e heluhelu kākou a pau i ka palapala noiʻi a Kiele Gonzales, aia ma ʻaneʻi:

Gonzalez, Keiko Kiele Akana Gooch. Nā Loina Kapa Inoa Kanaka Hawaiʻi: Mai ka Wā Kahiko a Hiki i ke Kenekulia 20. Palapala Noiʻi Laeoʻo. Ke Kulanui o Hawaiʻi ma Hilo, 2014.

Ma hope o ka heluhelu ʻana, e hoʻokō i kēia mau mea ʻelua:

• E hoʻopihapiha i ka palapala Haʻawina & Hoʻokō.

• E kākau i ka Hāpai Manaʻo #1: hoʻākāka mai i kekahi manaʻo i ʻupu aʻe ma muli o kou heluhelu ʻana i kēia pepa noiʻi, kālailai liʻiliʻi, a hāpai hoʻi i nīnau.

Waiho ʻia kēia haʻawina ma ka faila Hāpai Manaʻo ma ka pō Lāpule, lā 29 o Ianuali.

Na Kuehu e alakaʻi i ka papa ma ka lā 30. E hoʻomaka ana ʻo ia me ka wehewehe hou ʻana i nā mea waiwai a me nā māhele o kēia pepa (he 15 paha minuke). A laila, nāna e alakaʻi i ka wā kamaʻilio o ka papa.

**Eia kekahi - ua hoʻoponopono ʻia ka papa manawa ma kā kākou ʻolokeʻa. Aia nō ke waiho lā ma ka ʻaoʻao Nā Pono Papa.

E heluhelu aku i nā palapala noiʻi laeoʻo āu i koho ai, a e hoʻomākaukau i wahi hōʻuluʻulu (summary) pōkole no ua mau palapala nei. Waiho ʻia kēia mau paukū hōʻuluʻulu ma ka faila Palapala Noiʻi i Puka ma ka Waihona Google a kākou. A laila, kūkākūkā ʻia nō i ka hui ʻana o ka papa.

na Kuehu: Gonzales, Lum, Kimura

na Hoaloha: Neumann, Kelekolio, Basham

na Kapaiaʻala: Forrest, Ezell, Kawaiʻaeʻa

na Keleka: Lorenzo-Elarco, Shishido, Damas

naʻu: Au, Chun-Lum, Kahaunaele

‘Aʻohe papa i ka lā 16. A hui hou kākou i ka lā 23!