Nā Haʻawina 345

‘O ka haʻawina hope loa kēia o ke kau nei! Hulō!

Mai poina:

• 4 a ʻoi moʻolelo nūpepa i hōʻiliʻili a kālailai ʻia

• 5-8 ʻaoʻao, lele ka laina

• E kuhikuhi aku nō (cite) i ka ʻike i loaʻa ma kekahi wahi ʻokoʻa - he puke paha, he lola, a he papa kekahi

• E hana nō i Papa Kūmole no nā moʻolelo nūpepa a me nā kumu ʻike ʻē aʻe. Eia kekahi laʻana. E nānā aku nō ma ʻaneʻi i kōkua no nā ʻano kumu ʻike ʻokoʻa.

• I loko o ka puanaʻī, mai hōʻano hou i ka ʻōlelo o ka moʻolelo nūpepa kahiko.

Eia ka haʻawina hope loa no kēia kau, ʻo ia ka Papahana Noiʻi Nūpepa. Ma hope o kāu koho ʻana i kumumanaʻo maikaʻi, e ʻimi a loaʻa nā moʻolelo nūpepa kahiko he ʻehā a ʻoi no ia kumumanaʻo hoʻokahi. E heluhelu a kālailai aku nō, i loaʻa kekahi mau manaʻo nui mai loko mai o ua mau moʻolelo nei - he mau hua kēia o ka noiʻi ʻana.

Pōʻalima 12/2 & Pōʻakolu 12/7: Haʻi ʻōlelo

E wehewehe mai ʻoe i kekahi o nā manaʻo nui i loaʻa ma muli o kāu noiʻi ʻana, me ka hōʻike pū ʻana mai i kekahi o nā moʻolelo nūpepa nona ia mau manaʻo. 8-10 minuke ka lōʻihi o kēia haʻi ʻōlelo.

Pōʻalima 12/16: Pepa Noiʻi Nūpepa

Ma kēia pepa, e hōʻike mai nō ʻoe i nā hua o kāu noiʻi. ʻO nā manaʻo nui kēia i loaʻa ma o ka heluhelu a me ke kālailai ʻana i nā moʻolelo nūpepa, me ka ʻimi noiʻi ʻana paha i kahi ʻike e kākoʻo ana i ia mau manaʻo. Hōʻoia ʻia nō hoʻi e ka ʻike i loaʻa ma loko o nā moʻolelo nūpepa. 5-8 ʻaoʻao ka lōʻihi (lele ka laina), me ka loaʻa pū o ka Papa Kūmole (bibiliography) a me nā kuhikuhina (citations). Waiho ʻia i ka Faila Haumāna ma mua o ka hola 4:00 ʻaui o ka lā 16 o Kēkēmapa. (Eia ma ʻaneʻi kekahi laʻana o nei hana.)

Kā! ʻAne hala iaʻu kēia haʻawina! E huikala mai.

Ke ʻoluʻolu, ma mua o ka papa, e eʻe aku i ka ʻaoʻao ʻo Ka Hea, Ka Nīnau, me ka Pane. E heluhelu i ʻelua moʻolelo nona ka hea ʻana i ka mea kākau, me ʻelua moʻolelo nona ka nīnau me ka pane. A e kamaʻilio auaneʻi nō.

Mai poina, e hoʻomau i ka hoʻoikaika ʻana i ka moʻolelo ʻekolu no Ka Ulu Hoi. A, ke loaʻa ka moʻolelo a Kamāhie e wehewehe mai ana, e hoʻouka ʻia nō ma ka paena pūnaewele nei.

I ka Pōʻalima e wehewehe mai ai ʻo Kūpono i kekahi moʻolelo nūpepa. Aia ma ka ʻaoʻao Wehewehe Moʻolelo Nūpepa kahi e loaʻa ai. E hoʻomau aku nō i ka hoʻoikaika ʻana i ka moʻolelo 3 no Ka Ulu Hoi.

‘Elua haʻawina no kēia Pōʻakolu aʻe.

‘Akahi, e kākau i kā hou no ka moʻolelo 3 o Ka Ulu Hoi. E hoʻoponopono i nā ʻōlelo a e haku hou i nā māhele nāwaliwali. E hana ʻia nō ma ka palapala Google like, a mākaukau ma mua o ka papa i ka Pōʻakolu.

‘Alua, e kau ka noʻonoʻo i ke kumuhana o kāu noiʻi nūpepa e hana ai no ka pepa hope o kēia kau. Makemake ʻia kekahi kumuhana ʻano hāiki nō, i loaʻa nō naʻe nā laʻana maikaʻi i loko o nā nūpepa kahiko. E loaʻa iā ʻoe ʻekolu koho āu e hoihoi ai, a e ana pū hoʻi kākou i ia mau koho ma ka papa.

**E nānā hoʻi ma ka ʻaoʻao Wehewehe MNP o ke kahua nei, a loaʻa ka moʻolelo a Maile e wehewehe mai ana i ka Pōʻakolu!

E uhau mai i ke kā mua o kāu moʻolelo KUH#3 ma mua o ka papa i ka Pōʻakolu!! E like me ka mau, e waiho aku i loko o ka faila Pukana 3 o ka Waihona Google o ka papa.

Eia kekahi, e hana i kēia haʻawina pilina ʻōlelo no ke koho ʻana i ke "ai" a me ka ʻole. Ma kāu Faila Haumāna ponoʻī e mālama ʻia ai. E makaʻala hoʻi i ka ʻaoʻao Wehewehe MNP, a loaʻa maila kā Keʻala moʻolelo e wehewehe mai ana. Hū! Ua kau ka peʻa, ke holo nei nō kēia waʻa!!

Kupaianaha wale ka hana ʻimi noiʻi microfilm! Mahalo i ko ʻoukou pāʻani ʻoluʻolu ʻana i kēia pāʻani o ka wā ma mua iho.

I ka Pōʻalima, e wehewehe mai ana ʻo Uchi i kāna moʻolelo nūpepa i heluhelu ai. Hiki ke loaʻa ma ka ʻaoʻao Wehewehe MNP.

Eia kekahi, e hoʻolālā pū ana kākou i nā moʻolelo 3 no Ka Ulu Hoi. E hele mai me ka mākaukau no ka hoʻomōhala ʻana i kāu moʻolelo ponoʻī.

E hui ana ka papa i ka hale waihona puke ʻo Hamilton i ka lā 2 o Nowemapa!

E komo paha a kakali ma nā noho ʻoluʻolu ma kahi o ke kiʻi nui ma ka paia, a i ʻole e kakali ma waho a na Kumu Kahikina e kiʻi iā ʻoe.

Noi Moʻolelo

‘O ka wā kēia e hoʻopaʻa ai i nā kumumanaʻo o ka moʻolelo ʻekolu no Ka Ulu Hoi! E waiho i kāu Noi Moʻolelo ma loko o ka faila Pukana 3 ma ka waihona Google a kākou.

Hoʻomaʻamaʻa Hoʻohalike

E hoʻomau nō i ka hoʻohālikelike i ʻupu mua aʻe ma ka papa: e hoʻopili aku nō i kā Nāwahī moʻolelo no ke aloha ʻāina no ka hoʻākāka ʻana i ka like a like o kekahi mau mea. Ma ʻaneʻi e heluhelu ai i kaʻu mea i hana wikiwiki aku ai. Ua lawa ka 3-4 paukū no kēia hoʻomaʻamaʻa ʻana; waiho ʻia i ka faila Hoʻomaʻamaʻa ma ka waihona Google.

No ka Pōʻalima, e heluhelu hou i kā Nāwahī moʻolelo "Ke Aloha Aina; Heaha Ia?" E ʻimi aku a loaʻa nā loina kākau o loko a me ke ʻano o ko iala kūkulu manaʻo. A laila, e heluhelu i ke koʻolua o ua moʻolelo nei, ʻo ia hoʻi "Ka Mana o ka Mageneti." Pehea i ʻokoʻa ai? He aha nā manaʻo hou i hāpai ʻia? Ua lawa paha ka heluhelu ʻana i kekahi o ua mau moʻolelo nei he ʻelua?

Eia kekahi, e hoʻomākaukau no kā Hiʻilani Wehewehe MNP.

Eia ka haʻawina nui o kēia pule, ʻo ia hoʻi ka Pepa Ana Holomua.

• Wehewehe hou ʻia ke ʻano o kēia pepa ma ʻaneʻi.

• E hoʻopaʻa i hola e hui ai me aʻu, ma kēia palapala kākau inoa.

• E hoʻopau i ka pepa, a e waiho i kāu Faila Haumāna ponoʻī i ka lā ma mua o ka hālāwai.

Haʻawina heluhelu: Ke Aloha ʻĀina

No ka Pōʻakolu, e heluhelu i kēia moʻolelo kaulana i haku a hoʻopuka ʻia e Joseph Kahoʻoluhi Nāwahī:

"Ke Aloha Aina: Heaha Ia?" Ke Aloha Aina. 25 Mei 1895.

Wehewehe MNP

Na Kūʻehu e alakaʻi mai i ka hoʻomaopopo ʻana i kahi moʻolelo mai ka nūpepa kahiko mai. Hiki ke loaʻa ia moʻolelo ma ka ʻaoʻao Wehewehe MNP o ka paena nei. E nānā aku nō ka maka ma mua o ka hui ʻana o ka papa i ka Pōʻakolu.

E hana nui kākou i kēia pule i mea e paʻa pono ai ke kā hope o ka moʻolelo KUH #2! E makaʻala i kāu palapala Google, a me kaʻu mau manaʻo e waiho aku ai. Hoʻoponopono a hoʻoikaika ʻia, a pau loa i kēia pule aʻe.

Eia kekahi, e heluhelu hou paha i ka moʻolelo "Ka Hae Hawaii! Ke Koo o Hawaii!!", i paʻa pono kēia mau loina kākau i ʻike ʻia:

• ka hoʻomōhala ʻana i nā hua ʻōlelo like

• ka pīnaʻi

• ke kāhea

• ka hōʻoia ("ʻae")

• ‘aʻole..., akā...

• ‘ēkoʻa: i luna loa / i lalo loa; ke mau / ke hina

• nīnau a pane

• ka helu ʻana - he kāuna (4) nā mea o loko

• ka hoʻokomo ʻana i lālani mele: "ua kūpono ke mele ʻia ʻana nona nā lālani aloha i puana mua ʻia..."

Mau nō koʻu heluhelu ʻana i nā moʻolelo ʻelua no Ka Ulu Hoi - mahalo i ka hoʻomanawanui ʻana mai! E makaʻala i kāu Google Doc, a ke loaʻa koʻu mau manaʻo, e hoʻoikaika aku. E pau ana nō i kēia pule, a i ʻole kēia pule aku paha.

Eia kekahi, e heluhelu i ka moʻolelo a Keolamaupono e wehewehe mai ana i ka Pōʻalima!

Eia kekahi mau mea e heluhelu ai ma mua o ka papa i ka Pōʻakolu:

• Ka māhele nūpepa a Nāinoa e wehewehe mai ana i ka papa. (Aia nō hoʻi ma ka ʻaoʻao Wehewehe MNP o ka paena pūnaewele nei.)

• He kōlamu nūpepa i loaʻa iā ia ka hoʻohālike: "Ka Moo Chamelona!!! Nui ke Pahaohao Iaia." Ke Aloha Aina. 1 Iune 1895.

E hoʻomau nō hoʻi i ka hoʻoponopono ʻana i ka moʻolelo ʻelua no Ka Ulu Hoi!

Ka Ulu Hoi #2

Pōʻakolu: e haku hou i kāu moʻolelo e like me ka manaʻo i waiho ʻia e ke kumu a me nā hoa papa.

Pōʻalima: pau ke kā hope ma mua o ka loihape hope loa ʻana

Hōʻano hou ʻia (updated) kāu faila ma ka Waihona Google ma mua o ka hui ʻana o ka papa.

Ka Wehewehe MNP

Pōʻakolu: na Lokalia

Pōʻalima: na Kamele o Puʻuwai

Ke loaʻa, e waiho ʻia ana nā moʻolelo e heluhelu ai ma ka māhele Wehewehe MNP o ka paena pūnaewele nei. E heluhelu ma mua o ka hui ʻana o ka papa, a e hōʻea mai me ka mākaukau no ke kamaʻilio pū ʻana.

Hoʻomōhalahala ʻōlelo

Ma ka Pōʻalima, e alakaʻi ana ʻo Kumu Kalikoaloha i ke kālailai ʻana i kēia moʻolelo a me ke ʻano o ka hoʻomōhalahala ʻana i ka ʻōlelo o loko ā piha pono. E heluhelu aku nō ma mua o ka papa.

Inā ʻaʻole i pau kāu kā mua no ka moʻolelo Ka Ulu Hoi, e hoʻopau koke aku nō! Waiho ʻia ma ka faila "Pukana 2" ma mua o ka papa ma ka pōʻalima, o loaʻa ʻole kahi hua.

Eia kekahi, e haku hou i ka wehena o ia moʻolelo like nō, i ʻike ʻia ka pilina me ka ʻole paha. Eia kekahi mau wehena i kamaʻilio ʻia ma ka papa:

• ka ʻōlelo noʻeau

• ke poʻomanaʻo nui me ke kuhi hou ʻana aku iā ia

• ke kauoha (me ka ʻiae paha)

• ka wehewehe mua ʻana i ke kūlana o ia wā a wahi paha (setting the scene)

• ka hoʻolauna mua ʻana i ka manaʻo nui: "He wahi nūhou kaʻu..." "He lono hoʻomānaʻonaʻo kai loaʻa mai..." a me ka haʻi moʻolelo ma hope: "Penei kahi moʻolelo..."

• ke aloha ʻana i ka lehulehu ma ke ʻano he welina maoli, me ka wili pū ʻana i nā ʻōlelo i paʻa ma nā welina maʻamau me kekahi mea hou na ka haku moʻolelo

He paukū ka lōʻihi o kēia wehena hou. E pākuʻi ʻia ma ka faila like o kāu kā mua.

Whew, ke holo nei ka moku!

Eia ka haʻawina no ka Pōʻakolu - e haku ʻia kāu kā mua o ka moʻolelo KUH #2. E aho hoʻi ka haku ʻana a piha ka moʻolelo, mai ka mua a ka hope, i hiki ke hoʻoikaika ʻia i ka pule ma hope aku. Waiho ʻia ma loko o ka faila Pukana 2 ma kā kākou Google.

Eia hoʻi, e hoʻomanaʻo i kēia mau mea i hāpai ʻia ma ka papa, i paʻa pono ai kāu moʻolelo:

• ke ʻano o ka wehena i pili i ke kumu o ka moʻolelo

• ka hoʻokomo ʻana i nā ʻōlelo noʻeau a me nā ʻōlelo pili ʻāina

• ka hea ʻana i ka mea heluhelu no ka ʻapo koke ʻana iā ia

• ka pīnaʻi

• ke poʻomanaʻo a me ke kuhi hou ʻana i ka manaʻo ona

A me ka pilina ʻōlelo kekahi, e like me kai hōʻike ʻia ma ka papa kuhikuhi:

• ka painu ʻana + hunekuhi

• nā pani hakahaka no "pono"

• ‘o / o

• a pēlā aku!

Maikaʻi wale ka hui pū ʻana he alo a he alo i kēia lā!! Mahalo ko ʻoukou ʻaʻa ʻana mai i ka piʻina "ʻoluʻolu" o Kaimukī.

No ka Pōʻalima:

• Inā ʻaʻole i pau kāu noi moʻolelo KUH2, e hoʻopau koke a hoʻokomo i ka faila Pukana 2.

• Hoʻomaʻamaʻa: e wili pū aku i nā ʻōlelo a ʻoukou i haku ai i kēia lā, a loaʻa kekahi paukū/mau paukū paha. Iā ʻoe ke ʻano o ia paukū -- he welina/kāhea paha, he hoʻohanohano paha i kekahi kanaka mai laila mai, he moʻolelo pōkole paha no ko kākou hui ʻana ma laila i kēia lā, he hoʻohālikelike paha, a pēlā aku. ʻO ka mea nui, e wili ʻia nā poke ʻōlelo he nui i loko o ia paukū. (ʻAʻole i like kēia haʻawina me ka haʻawina hoʻopuka ʻōlelo noʻeau o ka pule aku nei.) Waiho ʻia i kāu Faila Haumāna ma mua o ka papa i ka Pōʻalima.

I kēia hopena pule, e hoʻopaʻa nō i ka moʻolelo #1 o Ka Ulu Hoi, a mākaukau no ke paʻi ʻana.

A laila, e hoʻomaka nō i ka hoʻokahua ʻana i kau moʻolelo ʻelua. E hana kope i ka palapala noi moʻolelo, hoʻopihapiha, a waiho ʻia i loko o ka faila "Noi Moʻolelo" ma lalo o ka "Pukana 2" ma Google.

E leka uila au iā ʻoukou ma mua o ka Pōʻakolu i mea e hōʻoia ai i kahi e hui ai ka papa. Mahalo ka hoʻomanawanui ʻana mai.

Mahalo i ka hoʻomanawanui ʻana mai i kou Luna Hoʻoponopono. Ke loaʻa koʻu mau manaʻo ma kāu faila Google, e hoʻoponopono aku nō. Eia kekahi, e hoʻomaka ʻiʻo nō i ka hoʻolālā ʻana i kāu moʻolelo KUH #2. E hoʻopaʻa ʻia ana nō i ka papa ma ka Pōʻalima.

Eia nō hoʻi kekahi Google Form no ka hui kino ʻana i kēia pule aʻe. Ke ʻoluʻolu, e hoʻopihapiha aku nō.

E lākou nei, e huikala mai i ka ʻulolohi loa o ka hoʻouka ʻana i nei haʻawina.

Ke mau nei nō ka hoʻoponopono ʻana i ka moʻolelo mua no Ka Ulu Hoi. E makaʻala ʻoukou i ka faila Google, a ke loaʻa koʻu mau manaʻo, e hoʻoponopono aku nō.

Eia kekahi moʻolelo nūpepa a kākou e kamaʻilio ai i ka papa ʻāpōpō. E nānā mua ka maka a hoʻomaopopo aku i kona manaʻo nui:

"O ka Ikaika ka Pono." Ka Makaainana. 18 Malaki 1895.