Nā Haʻawina 601

‘O ka pae mua ʻana hoʻi kēia a ko kākou waʻa i kahaone. ʻO ia hoʻi, ka hoʻokō ʻana i kēia haʻawina kākau pepa, he wehewehe mele, me ka haʻi ʻōlelo pū. 8-10 ʻaoʻao ka lōʻihi o ka pepa (lele ka laina), a he 10-15 minuke ka lōʻihi o ka haʻi ʻōlelo. Inā he mau nīnau a mea pohihihi paha i koe, e nānā i ka ʻolokeʻa papa a i ʻole e kamaʻilio pū me aʻu. A hui hou i kēia pōʻakahi aʻe!

‘Ekolu pule ka lōʻihi o ko kākou heluhelu a kamaʻilio ʻana no kēia moʻolelo kaulana a me nā māhele kālaimanaʻo ona. No kēia pule aʻe, e heluhelu aku nō i ka māhele mua (1-60, a hiki i ka wā i make ai ʻo Panaʻewa a pakele aku ʻo Hiʻiaka mā) a me ka māhele o hope (361-453, ma ka wā i hui like ai ʻo Hiʻiaka me Lohiʻau, ʻelua lāua i ka mānai hoʻokahi, a i ka hopena).

‘Aʻohe haʻawina kākau o kēia pule. Akā, e hoʻomākaukau kākou a pau no ka papa, penei: loaʻa kahi māhele kū i ka hoihoi a me ke aʻo; wae aku i paukū a i ʻāpana pōkole paha e heluhelu mai ai i mua o ka papa; kālailai ʻia nō kēlā māhele a kamaʻilio pū kākou.

Eia kekahi, e hoʻomau nō i ka mākaukau ʻana no ka papahana wehewehe mele e mālama ʻia ana i ka lā 14 o ʻOkakopa. He pepa (8-10 

‘aoʻao) a he haʻi ʻōlelo hōʻikeʻike (10-15 minuke)

Eia kākou ke haʻalele aku nei i ke kamaʻilio no ia mea he mele a he kālailai mele, a ke huli aku nei nō i nā moʻolelo o ka lāhui Kanaka. I kēia pule, e heluhelu ʻia kā Poepoe "Moolelo Hawaii Kahiko" - mai ka mua a ka hope me ka wikiwiki, a laila me ka nānā pono ʻana i kekahi māhele i loko ona.

Na ka Hui E ke kālai manaʻo (waiho ʻia ma kēia faila i ka pō Lāpule); Na ka Hui A hoʻi ka pane a me ka hoʻokamaʻilio.

Eia hoʻi, e hoʻomaka nō i ka ʻimi noiʻi a me ka hana ʻē aʻe e pono ai kāu Pepa Liʻiliʻi no ka wehewehe ʻana i kekahi mele. I ka lā 14 o ʻOkakopa ka lā e pau ai ka pepa a lawelawe ʻia ka haʻi ʻōlelo i loko o ka papa.

Eia nā mea e heluhelu ai i kēia pule:

• Kilau Pali. "Ke Mele ame ke Kaona o ia Mele i Hakuia." Nupepa Kuokoa.

• "He Kaona ko na Mele a Pau." Ka Leo o ka Lahui.

• Noenoe Silva, Aloha Betrayed: Native Hawaiian Resistance to American Colonialism. 180-191.

• Leilani Basham, I Mau ke Ea o ka ʻĀina i ka Pono: He Puke Mele Lāhui no ka Lāhui Hawaiʻi. Pepa nui laeʻula. Honolulu: University of Hawaiʻi at Mānoa, 2007. v; 48-51; 78-97

• Kīhei de Silva, "Hoehoe Nā Waʻa (Kawaihae)," "Māhukona," "Mauna Kea," "Ka Manu." He Aloha Moku o Keawe. Kailua: Kīhei de Silva, 1997.

Na ka Hui ʻĀ ke kālai manaʻo - ma kēia faila e waiho ʻia ai. Na ka Hui ʻĒ hoʻi ka pane a me ka hoʻokamaʻilo.

Eia hoʻi, e hoʻomaka i ka ʻimi ʻana a me ke koho ʻana i kāu mele e wehewehe ai no ka Pepa Pōkole #1. E kamaʻilio ʻia i kēia papa aʻe.

Eia ka palapala e heluhelu ai i kēia mau pule:

Theodore Kelsey. "He Mele Pule no na Waa a Kana." Ke Alakai o Hawaii.

Eia hoʻi, na ka hui E e kākau i Kālai Manaʻo (Makana, Tiana, me Iakopa) a waiho aku i kēia faila ma Google. Mai poina, ʻo ka hola 10 o ka pō Lāpule ka palena pau, i hiki ke heluhelu ʻia e mākou. Na ka hui A nō ka hoʻomākaukau i pane/nīnau/kamaʻilio no kēlā me kēia haumāna i kākau i pepa. Aia hoʻi ma kēia palapala he mau manaʻo no ka hoʻoikaika hou ʻana i kēia hana maʻamau o ka papa.

E heluhelu aku i kēia wehewehena mele, i puka i ka nūpepa ʻo Ke Alakai o Hawaii i ka makahiki 1929:

• "He Mele no Kamehameha V." Ke Alakai o Hawaii.

A laila, e kākau ka hui A (Keolamaupono, Puʻuwaihaokila, Kaniala, a me Nāinoa) i ke Kālai Manaʻo a waiho ʻia i loko o kēia Faila Google. Na ka hui E hoʻi (Tiana, Kalā, Makana, Iakoba) ka hoʻomākaukau i pane no ua mau pepa nei.

Inā he huikau paha kou no ke ʻano o nei haʻawina, e heluhelu hou i ka ʻolokeʻa papa. A inā nele paha ʻoe i kahi manaʻo e hoʻomōhala aku ai ma kāu pepa, aia ma keia palapala kekahi mau laʻana kūpono.