Nā Haʻawina 431

Eia hoʻi nā mea i koe iā kākou i kēia mau pule hope loa o ke kau:

Pōʻakahi 4/29

E naue like kākou i ke kūpale a Kumu Haʻalilio. Hola 9 o ke kakahiaka, ma Moore 155A a i ʻole ma Zoom.

Pōʻakolu 5/1

Pau ka Mokuna Moʻolelo. Waiho ʻia i loko o kēia faila ma Google.

Pōʻalima 5/10

Pau ka pepa kālailai kaila kākau: e wehewehe i nā mea hoihoi a me ke kaila o kāu moʻolelo kaʻao i heluhelu ai i kēia kau, me ka hoʻokomo pū ʻana i mau laʻana mai ka moʻolelo mai. Waiho ʻia i kāu faila haumāna ma mua o ka hola 4 ʻauinalā.

E hoʻomau nō ā paʻa ke kā mua, a waiho ʻia i loko o ka faila kūpono. ʻO ka lā 1 o Mei ka lā e paʻa pono loa ai kēia mokuna o kāu moʻolelo lōʻihi.

Ō hoʻomau nō i ka haku ʻana i ka mokuna o kāu moʻolelo lōʻihi. Ma ʻaneʻi e waiho ai i ke kā mua, i holomua pono kākou i kēia mau pule hope loa o ke kau nei.

Eia kekahi, e kipa mai ana ʻo Kama Kaaikaula i kā kākou papa i ka Pōʻakahi. ʻAkahi ʻo ia i puka me ke kekelē laeoʻo, a ʻo kāna papahana, ʻo ia ka haku ʻana i moʻolelo kaʻao hou ma ka ʻōlelo Hawaiʻi. Eia kāna moʻolelo i haku ai (hoʻomaka nō ka moʻolelo i ka ʻaoʻao 29 o ka palapala). E heluhelu liʻiliʻi aku ma mua o ka papa, a e hoʻomākaukau hoʻi i mau nīnau e hāpai aku ai nona.

E haku nō i kekahi māhele o kāu mokuna moʻolelo, me ka hoʻopilipili pū ʻana i ke kumu hoʻohalike āu i koho ai. Waiho ʻia i loko o kēia faila ma mua o ka papa i ka Pōʻakolu.

E ʻimi nō i kumu hoʻohalike no kekahi māhele/manaʻo/hana nui o kāu mokuna moʻolelo e haku nei. E hana kope aku, a hoʻokomo i loko o ka faila Kumu Hoʻohalike ma kā kākou Waihona Google, a e hoʻomākaukau no ka wehewehe ʻana mai i ka Pōʻakahi.

Eia hoʻi, inā ʻaʻole i pau kāu mau ʻolokeʻa ʻelua (no ka moʻolelo piha a me ka mokuna hoʻokahi), e hoʻokō aku nō ma mua o ka papa i ka Pōʻakahi.

‘Aʻohe papa i ka lā 3 a me ka lā 8 o ʻApelila!

‘O ka wā hoʻi kēia e hoʻolālā pono ai i kāu mokuna moʻolelo, ka mea hope loa hoʻi e haku ai i kēia kau. Ma mua o ka papa i ka lā 10, e hoʻokō ʻia kēia mau mea:

• he ʻolokeʻa (outline) no ka moʻolelo lōʻihi piha

• he ʻolokeʻa no ka mokuna hoʻokahi āu e kākau piha ai, me ka wehewehe pono ʻana i ke ʻano o ka meʻe nui o kāu moʻolelo

• hoʻokomo ʻia ua mau ʻolokeʻa nei ma loko o kēia faila

• loaʻa kekahi kumu hoʻohalike mai kekahi moʻolelo kaʻao kahiko - he māhele nō i ʻane like kona ʻano me ke ʻano o kāu mokuna e haku ai. e laʻa, inā he hakakā kāu mokuna, e ʻimi i māhele hakakā ma kekahi moʻolelo kahiko. inā he ʻimina ia, e ʻimi i māhele ʻimina. hoʻokomo ʻia ua kumu hoʻohalike nei i loko o kēia faila - e kamaʻilio ʻia ma ka papa ke hoʻi pū kākou.

He papa nō i ka Pōʻakahi! E hele mai!

I mākaukau, e nalu iho i loko ou no ke ʻano o kāu moʻolelo piha e haku ai. He moʻolelo hakuhia nō, a i ʻole he moʻolelo ʻohana (ʻaʻole i paʻa ʻē ma mua). A he moʻolelo i hiki ke hoʻokaʻawale ʻia i nā mokuna he ʻewalu a ʻoi. E kākau hoʻi ma kāu puke moʻomanaʻo (a i ʻole ma kekahi pepa, inā aia iaʻu kāu puke) i nā manaʻo nui o nēia moʻolelo āu e haku ana. ʻO ia kā kākou e kūkākamaʻilio ai i ka Pōʻakahi.

Me ʻoukou nō ke aloha me ka nanea pū i kēia pule hoʻomaha. Ke hiki koke mai nei ka hopena o Malaki. No laila, i kēia pule aʻe nō e paʻa pono ai kāu Puke Keiki - ka ʻōlelo a me nā kiʻi pū kekahi. I ka Pōʻakolu, e lawe mai nō i kope i ka papa, a i ʻole e hoʻokomo aku i loko o kēia faila nei.

‘O kēia pule aʻe ka pule hope loa ma mua o ka wā hoʻomaha! No laila, e kākau aʻe nō i ke kā piha o kāu puke keiki, a waiho akula i loko o kēia Faila Google ma mua o ka papa i ka Pōʻakahi.

E kikokiko ʻia ka mea holoʻokoʻa ma ka ʻaoʻao hoʻokahi, akā e hoʻolālā no nā ʻaoʻao he 24 a i ʻole 32, i hoʻonohonoho pono ʻia ka puke.

E ho‘omaka nō i ka ho‘olālā ‘ana i kāu puke keiki (pae #2 a i ‘ole pae #3):

• he aha ka mo‘olelo/pō‘aiapili o kāu puke?

• na wai ka ‘ōlelo? he pāpā ‘ōlelo ko loko?

• he aha nā analula e pīna‘i ana (e aho ke koho ‘ana i ho‘okahi a ‘elua paha, i pa‘a pono)

Kākau ‘ia kēia mau mana‘o i loko o kāu puke kākau, a holomua kākou i ka Pō‘akolu.

I kēia pule, e ho‘omaka kākou i ka heluhelu a me ke kama‘ilio ‘ana no ia mea he puke kamali‘i a he puke keiki paha. I mea e ho‘omākaukau iki ai, e kau aku ma ke kahua pūnaewele ‘o noeau.org/napuke. E koho i ‘ekolu puke a e heluhelu aku. Ma hope o ka heluhelu ‘ana, e waiho i mana‘o ma loko o kāu puke kākau no ka pane ‘ana i kekahi nīnau o lalo nei:

• he aha nā ha‘awina o kēia mau puke?

• he aha nā mea a ke keiki e hoihoi ai ke heluhelu ‘o ia i kēia mau puke?

• he aha ke kuleana o ka pīna‘i ma kēia mau puke?

‘O ka lā kēia e huakaʻi ai kākou a ʻike maka aku iā Puʻu ʻUalakaʻa. Ma uka nō kākou e hui ai, ma ka Pāka Mokuʻāina ʻo ʻUalakaʻa. E lawe mai hoʻi i:

• kahi mea e noho ai (noho/hāliʻi/moena)

• pale ua (lākeke/māmalu)

• peni/penikala a me kekahi papa a puke paha e paʻa ai kāu pepa

• mea inu/ʻai māmā e lawa kūpono ai ʻoe

E hoʻopaʻa mua nō hoʻi i kāu wehewehe ʻana i wahi pana a kākou e kiʻei aku ai mai uka mai o ʻUalakaʻa, a mākaukau no ka haʻi pōkole ʻana i kona moʻolelo i mua o nā haumāna ʻē aʻe.

Eia hoʻi, inā e lomilomi hou ana ʻoe i kāu moʻolelo pōkole, e hana nō ma mua o ka hopena o nei pule. Mahalo!

E hoʻomau nō i ka heluhelu ʻana i kāu kaʻao i koho ai no nei kau. Ke ʻike ʻia kekahi māhele kū i ka hoihoi, e mālama aku nō ma ka ʻaoʻao, a hiki  mai ka lā e nānā pū ai kākou i ua mau māhele hoihoi nei.

Eia kekahi, ʻo ka lā 28 nō o kēia mahina ka lā e pau loa ai kāu moʻolelo pōkole. Inā he manaʻo e hoʻoponopono hou aku, e hana oi kau ka lā!

Ma ʻaneʻi e waiho ʻia ai kāu moʻolelo pōkole - ka mea holoʻokoʻa i paʻa. E makaʻala hoʻi i kāu mau kā mua - e waiho au i manaʻo ma laila no ka hoʻoponopono a me ka hoʻoikaika ʻana i ka moʻolelo ma mua o ka pau pono ʻana.

Auē, e kala mai iaʻu - kuhihewa au i ka haʻawina e hoʻokō ai no ka Pōʻakolu! E aho ka hoʻopaʻa ʻana i ke kā piha o ka moʻolelo pōkole, a paʻa pono. Ke paʻa, e hoʻopihapiha nō kākou i nā palapala ana moʻolelo.

Mahalo ka hoʻomanawanui ʻana mai!

Mahalo iā ʻoukou haumāna i hele pū i ka papa i nei lā, me ka hoʻomanawanui ʻana iaʻu, i lohe (hou) ʻia ke ʻano o nā moʻolelo pōkole e haku ʻia nei. Ma muli o ia hana, ʻupu hou aʻe ka manaʻo e koho pono i kāu moʻolelo a me kona ʻano. ʻOi aku paha ka maʻalahi a me ka holo pono ʻana o ka hana inā he moʻolelo pōkole maoli nō. A inā nō e haʻi ʻia kekahi māhele o ka moʻolelo lōʻihi, e kau pono i nā palena o ia māhele o ka moʻolelo, i piha ke haʻi hou ʻia.

No laila, eia nō ka hana e hoʻokō ai no ka pae pono ʻana o nei waʻa:

• 2/12: e hoʻomau aku nō i ke kākau moʻolelo, a hiki paha i kona hopena, a i ʻole ʻaneʻane nō e hiki aku i kona hopena. e makaʻala hoʻi i nā manaʻo aʻu e waiho ai ma kāu palpala, a hoʻoponopono/hoʻopihapiha aku. Ma ʻaneʻi ka faila e hoʻokomo ʻia aku ai.

• 2/14: pau loa ke kā mua, i lawa ka manawa no ka hoʻoponopono

• 2/21: hoʻihoʻi ʻia maila ke kā hope, ua hoʻoponopono ʻia, haku ʻia nō a lawa

Mai poina hoʻi ke kōkua o nā mea kākau i hele ma mua. I hele a pilikia kāu hana, e nānā hou i nā moʻolelo i waiho ʻia ma nei faila a me nā moʻolelo pōkole, nā moʻolelo wahi pana hoʻi i loaʻa ma ʻaneʻi. Ua waele mua ʻia ke ala; ʻo kā kākou ka hahai aku.

Ke paʻa kou manaʻo no ka moʻolelo pōkole āu e haku ai, e hoʻomaka nō, me ka hoʻokō ʻana i kēia mau mea ʻelua ma mua o ka papa i ka Pōʻakahi:

• ka haʻi pōkole ʻana i ka moʻolelo holoʻokoʻa (he ʻano hōʻuluʻulu paha)

• ka paukū mua o ia moʻolelo (kona haʻi piha ʻana)

Waiho ʻia kēia mau mea ʻelua (ma ka palapala hoʻokahi) i loko o nei faila. I ka Pōʻakahi, e kōkua ana ʻo Makia iā ʻoukou no ka hoʻomōhalahala ʻana i ua moʻolelo nei. I mua!

Eia kekahi kaʻao pōkole e heluhelu ai no ka papa i ka Pōʻakolu:

"He Kaao no Kaanae." Ke Au Okoa, 17 Kepakemapa 1866.

E kau hoʻi ka noʻonoʻo i nā mea hoihoi o ka haku moʻolelo, pēlā pū me kona anaina, kona pae ʻōlelo, kona kaila, a pēlā aku.

Eia kākou ke hoʻokoke aku nei i ka wā e haku ʻia ai kā ʻoukou mau moʻolelo pōkole ponoʻī. No laila, e hoʻokaʻawale i kekahi manawa i kēia pule no ke kau pono o ka manaʻo ma ke kumuhana a me ke ʻano o kāu moʻolelo e haku ai. No ka manawa, lawa ke kiʻi wale ʻana i ka inoa a i ʻole ka manaʻo nui o kāu moʻolelo. E kākau nō naʻe i kekahi mau koho, i loaʻa kekahi mau mea e kamaʻilio ai ma ka papa i ka Pōʻakahi. Kākau ʻia paha ma luna o kekahi pepa paʻa, i hiki ke hoʻokomo ʻia i kāu puke moʻomanaʻo ke loaʻa hou aku iā ʻoe.

E like me kaʻu i wehewehe ai ma ka papa, iā ʻoe nō ke ʻano o kāu moʻolelo: he moʻolelo hakuhia paha, he moʻolelo ʻohana, he moʻolelo haole āu e lawe-Hawaiʻi ai, he moʻolelo kahiko āu e haʻi hou ai, a pēlā aku nō.

E nānā hou paha i kēia papa kuhikuhi, kahi e loaʻa ai nā laʻana o ka launa mua ʻana o nā kānaka ma nā moʻolelo kaʻao. A e hoʻopilipili aku i ia kaila kākau (me nā huaʻōlelo pū kekahi) no ka launa mua ʻana o nā meʻe mai kekahi kiʻiʻoniʻoni a moʻolelo paha i paʻa ʻē iā ʻoe. Kākau ʻia i loko o ka puke moʻomanaʻo, a lawe ʻia i ka papa i ka Pōʻakolu.