Nā Haʻawina 345

5 & 7 ʻOkakopa

KUH #2; Hoʻomōhalahala ʻōlelo

Ka Ulu Hoi #2

Pōʻakolu: e haku hou i kāu moʻolelo e like me ka manaʻo i waiho ʻia e ke kumu a me nā hoa papa.

Pōʻalima: pau ke kā hope ma mua o ka loihape hope loa ʻana

Hōʻano hou ʻia (updated) kāu faila ma ka Waihona Google ma mua o ka hui ʻana o ka papa.


Ka Wehewehe MNP

Pōʻakolu: na Lokalia

Pōʻalima: na Kamele o Puʻuwai

Ke loaʻa, e waiho ʻia ana nā moʻolelo e heluhelu ai ma ka māhele Wehewehe MNP o ka paena pūnaewele nei. E heluhelu ma mua o ka hui ʻana o ka papa, a e hōʻea mai me ka mākaukau no ke kamaʻilio pū ʻana.


Hoʻomōhalahala ʻōlelo

Ma ka Pōʻalima, e alakaʻi ana ʻo Kumu Kalikoaloha i ke kālailai ʻana i kēia moʻolelo a me ke ʻano o ka hoʻomōhalahala ʻana i ka ʻōlelo o loko ā piha pono. E heluhelu aku nō ma mua o ka papa.

30 Kepakemapa

KUH #2

Inā ʻaʻole i pau kāu kā mua no ka moʻolelo Ka Ulu Hoi, e hoʻopau koke aku nō! Waiho ʻia ma ka faila "Pukana 2" ma mua o ka papa ma ka pōʻalima, o loaʻa ʻole kahi hua.


Eia kekahi, e haku hou i ka wehena o ia moʻolelo like nō, i ʻike ʻia ka pilina me ka ʻole paha. Eia kekahi mau wehena i kamaʻilio ʻia ma ka papa:

  • ka ʻōlelo noʻeau

  • ke poʻomanaʻo nui me ke kuhi hou ʻana aku iā ia

  • ke kauoha (me ka ʻiae paha)

  • ka wehewehe mua ʻana i ke kūlana o ia wā a wahi paha (setting the scene)

  • ka hoʻolauna mua ʻana i ka manaʻo nui: "He wahi nūhou kaʻu..." "He lono hoʻomānaʻonaʻo kai loaʻa mai..." a me ka haʻi moʻolelo ma hope: "Penei kahi moʻolelo..."

  • ke aloha ʻana i ka lehulehu ma ke ʻano he welina maoli, me ka wili pū ʻana i nā ʻōlelo i paʻa ma nā welina maʻamau me kekahi mea hou na ka haku moʻolelo

He paukū ka lōʻihi o kēia wehena hou. E pākuʻi ʻia ma ka faila like o kāu kā mua.

28 Kepakemapa

KUH 2 - kā mua

Whew, ke holo nei ka moku!


Eia ka haʻawina no ka Pōʻakolu - e haku ʻia kāu kā mua o ka moʻolelo KUH #2. E aho hoʻi ka haku ʻana a piha ka moʻolelo, mai ka mua a ka hope, i hiki ke hoʻoikaika ʻia i ka pule ma hope aku. Waiho ʻia ma loko o ka faila Pukana 2 ma kā kākou Google.


Eia hoʻi, e hoʻomanaʻo i kēia mau mea i hāpai ʻia ma ka papa, i paʻa pono ai kāu moʻolelo:

  • ke ʻano o ka wehena i pili i ke kumu o ka moʻolelo

  • ka hoʻokomo ʻana i nā ʻōlelo noʻeau a me nā ʻōlelo pili ʻāina

  • ka hea ʻana i ka mea heluhelu no ka ʻapo koke ʻana iā ia

  • ka pīnaʻi

  • ke poʻomanaʻo a me ke kuhi hou ʻana i ka manaʻo ona

A me ka pilina ʻōlelo kekahi, e like me kai hōʻike ʻia ma ka papa kuhikuhi:

  • ka painu ʻana + hunekuhi

  • nā pani hakahaka no "pono"

  • ‘o / o

  • a pēlā aku!

23 Kepakemapa

Noi Moʻolelo; Hoʻomaʻamaʻa

Maikaʻi wale ka hui pū ʻana he alo a he alo i kēia lā!! Mahalo ko ʻoukou ʻaʻa ʻana mai i ka piʻina "ʻoluʻolu" o Kaimukī.


No ka Pōʻalima:

  • Inā ʻaʻole i pau kāu noi moʻolelo KUH2, e hoʻopau koke a hoʻokomo i ka faila Pukana 2.

  • Hoʻomaʻamaʻa: e wili pū aku i nā ʻōlelo a ʻoukou i haku ai i kēia lā, a loaʻa kekahi paukū/mau paukū paha. Iā ʻoe ke ʻano o ia paukū -- he welina/kāhea paha, he hoʻohanohano paha i kekahi kanaka mai laila mai, he moʻolelo pōkole paha no ko kākou hui ʻana ma laila i kēia lā, he hoʻohālikelike paha, a pēlā aku. ʻO ka mea nui, e wili ʻia nā poke ʻōlelo he nui i loko o ia paukū. (ʻAʻole i like kēia haʻawina me ka haʻawina hoʻopuka ʻōlelo noʻeau o ka pule aku nei.) Waiho ʻia i kāu Faila Haumāna ma mua o ka papa i ka Pōʻalima.

21 Kepakemapa 2022

Noi Moʻolelo - KUH2

I kēia hopena pule, e hoʻopaʻa nō i ka moʻolelo #1 o Ka Ulu Hoi, a mākaukau no ke paʻi ʻana.


A laila, e hoʻomaka nō i ka hoʻokahua ʻana i kau moʻolelo ʻelua. E hana kope i ka palapala noi moʻolelo, hoʻopihapiha, a waiho ʻia i loko o ka faila "Noi Moʻolelo" ma lalo o ka "Pukana 2" ma Google.


E leka uila au iā ʻoukou ma mua o ka Pōʻakolu i mea e hōʻoia ai i kahi e hui ai ka papa. Mahalo ka hoʻomanawanui ʻana mai.

16 Kepakemapa 2022

Ka Ulu Hoi

Mahalo i ka hoʻomanawanui ʻana mai i kou Luna Hoʻoponopono. Ke loaʻa koʻu mau manaʻo ma kāu faila Google, e hoʻoponopono aku nō. Eia kekahi, e hoʻomaka ʻiʻo nō i ka hoʻolālā ʻana i kāu moʻolelo KUH #2. E hoʻopaʻa ʻia ana nō i ka papa ma ka Pōʻalima.


Eia nō hoʻi kekahi Google Form no ka hui kino ʻana i kēia pule aʻe. Ke ʻoluʻolu, e hoʻopihapiha aku nō.

14 Kepakemapa 2022

KUH 1; "O ka Ikaika ka Pono"

E lākou nei, e huikala mai i ka ʻulolohi loa o ka hoʻouka ʻana i nei haʻawina.


Ke mau nei nō ka hoʻoponopono ʻana i ka moʻolelo mua no Ka Ulu Hoi. E makaʻala ʻoukou i ka faila Google, a ke loaʻa koʻu mau manaʻo, e hoʻoponopono aku nō.


Eia kekahi moʻolelo nūpepa a kākou e kamaʻilio ai i ka papa ʻāpōpō. E nānā mua ka maka a hoʻomaopopo aku i kona manaʻo nui:

"O ka Ikaika ka Pono." Ka Makaainana. 18 Malaki 1895.

9 Kepakemapa 2022

Kā Hope (paha) - Ka Ulu Hoi #1

E hoʻopaʻa hou nō i kāu moʻolelo nūpepa mua no Ka Ulu Hoi. Hoʻoponopono ʻia nā mea i kaha ʻia ma ka polū, a hoʻokomo ʻia nā manaʻo i hāpai ʻia ma ka ʻaoʻao comments. Paʻa kēia kā ma mua o ka hui ʻana ma ka Pōʻalima.

7 Kepakemapa 2022

KUH 1 - kā ʻelua

E nā mea kākau o Ka Ulu Hoi ē,

‘O kēia Pōʻalima ka lā e pau ai kāu moʻolelo nūpepa mua, a mākaukau no ke paʻi ʻana aku. No laila, e nānā hou i ke kā mua. E hoʻoponopono i nā mea i hemahema. A e haku hou i nā māhele i pohihihi a nāwaliwali paha. E loaʻa ke kā hou (new draft) ma mua o ka papa i kēia Pōʻakolu. Hiki ke hana ʻia ma ka faila Google like. Mai poina ka haku ʻana i poʻomanaʻo (headline) kūpono!!

31 ʻAukake & 2 Kepakemapa

Ka Hōʻiliʻili Wehena a me ke Kā Mua o ka moʻolelo KUH

Eia nā haʻawina ʻelua o ka papa 345.


No ka Pōʻakolu: Hōʻiliʻili Wehena

E kau ma papakilodatabase.com, ʻimi a loaʻa ka pukana (issue) hoʻokahi o kekahi nūpepa. E heluhelu i ka pukana holoʻokoʻa, a e hoʻopihapiha i kekahi papa kuhikuhi i kēia mau mea: ka inoa o ka moʻolelo, ka mea kākau (inā i loaʻa), kona wehena, ka ʻaoʻao i puka ai ka moʻolelo, a me kona ʻano. Eia hou kekahi wehewehe ʻana i ka haʻawina (me kahi mau ʻōkuhi no papakilo); eia hoʻi kekahi kumu hoʻohalike.

**I ka P3, e kamaʻilio ana kākou no nā mea i loaʻa.


No ka Pōʻalima: Kā Mua, KUH1

E kākau nō i ke kā mua (first draft) o kāu moʻolelo no Ka Ulu Hoi. E piha ka ʻaoʻao 1-2, a e waiho ʻia ma ka faila Pukana 1 o Google ma mua o ka hui ʻana o ka papa i ka Pōʻalima. Mai ʻulolohi mai ʻoukou!!

24 ʻAukake 2022

Noi Moʻolelo - KUH1

Eia kākou ke luʻu koke nei i ke kai hohonu ʻo ke kākau moʻolelo nūpepa. Mai piholo!!


No kēia Pōʻalima, e hoʻopaʻa i ke kumumanaʻo o kāu moʻolelo mua no ka nūpepa Ka Ulu Hoi. Wae ʻia paha kekahi mea mai ka Jamboard a kākou i hana pū ai, a i ʻole nāu paha e haku i mea hou. A laila, e hoʻīli aku i ka faila Noi Moʻolelo mai kā kākou Faila Google, hoʻopihapiha i kāu mea ponoʻī, a waiho akula i ka faila Pukana 1. E holomua like kākou!