Nā Haʻawina 345

Ma loko o kāu puke moʻomanaʻo, e helu papa mai i nā huaʻōlelo e pono ai kāu moʻolelo ʻelua no Ka Ulu Hoi, pēlā pū me nā ʻōlelo pōkole (he mau ʻōlelo noʻeau, ʻōlelo kaena, inoa kapakapa, lālani mele, ʻōlelo hoʻohenehene, hoʻōho, a pēlā aku).

E lilo kēia i ʻeke "pua" e wili ai paha i loko o kāu "lei" he moʻolelo nūpepa.

Ma ka lā 4 o ʻOkakopa e pau ai ke kā mua o ua moʻolelo nūpepa nei.

E paʻa kou manaʻo no kāu moʻolelo KUH #2 i kēia Pōʻakolu. Eia hoʻi, e heluhelu (hou paha) i ka moʻolelo nūpepa ʻo "O ka Ikaika ka Pono." Aia i loko ona kekahi wehena a panina hoihoi, a me kekahi mau loina kākau ʻē aʻe a kākou e nānā pū ai.

**Mai poina ka lawe ʻana i kāu Puke Moʻomanaʻo i ka papa - e hōʻiliʻili ana au i nā puke no ka hāʻawi ʻana i kaha!!

E noke kākou a mākaukau nā moʻolelo no ke paʻi ʻana ma Ka Ulu Hoi. Mai poina ka waiho ʻana i kiʻi ma loko o ka waihona Google!

Eia hoʻi, e heluhelu i nā wehena o kēia mau moʻolelo kahiko. E kamaʻilio kākou no ka ʻokoʻa o kēlā me kēia ke hui kākou i ka Pōʻakahi.

• "Ka Poloai a ka Hui Aloha Aina a na Wahine." Ka Leo o ka Lahui. 2 Iulai 1894.

• "Pakele mai ke Ahi." Ka Makaainana. 24 ʻAukake 1896.

• "O ka Ikaika ka Pono." Ka Makaainana. 18 Malaki 1895.

• "Ke Aloha Alii o ka Lahui Hawaii." Hawaii Holomua. 18 Ianuali 1893.

E nānā hou i ka moʻolelo ʻo "E Hoomaikai Aku i ka Mea i Manao Ino Mai." A e ʻimi aku i nā loina kākau i loaʻa ma loko ona. Eia kekahi mau loina kākau a kākou i kamaʻilio iki ai:

• ke poʻomanaʻo

• ke kuhikuhi ʻana i ke poʻomanaʻo

• ka hea ʻana i ka mea heluhelu

• ke ʻano o ka welina/wehena

• ka nīnau me ka pane

Eia hoʻi, e hoʻomau nō i ka hoʻoponopono ʻana i ka moʻolelo KUH mua.

E hālāwai me aʻu, e haku hou i nā māhele nāwaliwali o ka moʻolelo mua no Ka Ulu Hoi, a e paʻi aku i kiʻi no ka hoʻopuka ʻana. E pau ana nō i ka hopena o kēia pule.

9/11: ʻAʻole kākou e hui ana ma ka papa. E hoʻopaʻa naʻe i kā hou o kāu moʻolelo KUH - e heluhelu hou au, i hiki ke hoʻoponopono ʻia i kēia pule.

E kau nō hoʻi ma calendly.com/kumukahi no ka hoʻopaʻa ʻana i hālāwai no kāua. Ma laila nō e hoʻoponopono hou ʻia ai kāu moʻolelo KUH.

Haʻawina Hoʻomaʻamaʻa: Ma loko o kāu puke moʻomanaʻo, e kākau i ʻekolu wehena ʻokoʻa no kāu moʻolelo KUH, penei:

• ka hea ʻana i ka mea heluhelu (me nā ʻano ʻōlelo he nui i pili iā ia)

• ka hoʻomaka ʻana me ka haʻawina o ka moʻolelo

• ke kuhikuhi ʻana i ke poʻomanaʻo (headline)

Lawe ʻia kēia puke maoli i ka papa ma ka Pōʻakolu, i kamaʻilio pū kākou no ua mau wehena nei.

Maikaʻi wale ka hoʻokahua ʻia ʻana o nā moʻolelo mua o Ka Ulu Hoi. I kēia pule, e hoʻomau nō i ka haku ʻana, ka hoʻoponopono ʻana, a me ka hoʻoikaika ʻana i kāu moʻolelo ma nā ʻano a pau i hiki. 

Eia kekahi, e kamaʻilio ana kākou no kekahi mau ʻano e hoʻomaka ai i ka moʻolelo nūpepa. No laila, e heluhelu nō i kēia mau moʻolelo ma lalo nei, ma mua o ka hōʻea ʻana i ka papa ma ka Pōʻakolu:

• Elia Helekunihi. "E Ala, E Eu, E Liuliu, E Lawe i ka Nupepa KUOKOA me Hawaii Pae Aina i Huiia, no ka 1893." Ka Nupepa KuokoaKe Alakai o Hawaii. 12 Nowemapa 1892.

• "Ua Eo ka Maluhia ia Hawaii." Ka Leo o ka Lahui. 17 Ianuali 1893.

• "He Aha ka Olelo Hawaii i Kekahi Poe?" Ka Hoku o Hawaii. 8 Mei 1940, 2.

E pau ke kā mua o kāu moʻolelo nūpepa! Hoʻokomo ʻia kekahi kope ma kēia Faila Google. A lawe ʻia maila kekahi kope i ka papa - paʻa paha ma ka pepa, a i ʻole ma ka lolouila nō e loaʻa ai.

Eia hoʻi kekahi mau wehena hoihoi, inā aia nō ʻoe ke ʻimi nei i inspiration:

• "Ke Aloha Alii o ka Lahui Hawaii." Hawaii Holomua. 18 Ianuali 1893.

• Elia Helekunihi. "E Ala, E Eu, E Liuliu, E Lawe i ka Nupepa KUOKOA me Hawaii Pae Aina i Huiia, no ka 1893." Ka Nupepa KuokoaKe Alakai o Hawaii. 12 Nowemapa 1892.

• "He Aha ka Olelo Hawaii i Kekahi Poe?" Ka Hoku o Hawaii. 8 Mei 1940, 2.

• "Ka Hookaawale aina." Ke Aloha Aina. 25 Mei 1895, 4.

• "O ke Au o ka Manawa ka Hoike." Ke Aloha Aina. 1 Iune 1895, 3.

‘O ka lā 30 o ʻAukake (kēia Pōʻakolu aʻe), ʻo ia ka lā e pau ai kāu kā mua o ka moʻolelo KUH mua. E hoʻomaka koke nō i ka hōʻiliʻili ʻana i ka ʻike e pono ai a me ka haku ʻana i kāu moʻolelo.

Eia nō hoʻi kekahi mea e heluhelu ai ma mua o ka hui ʻana o ka papa i ka Pōʻakahi. E kamaʻilio pū ana kākou no nā loina kākau o loko a me ka leo kākau ona.

"Kela Mau Aina Leialii." Hawaii Holomua. 24 ʻAukake 1893, 2.

E luʻu koke iho kākou i ka haku moʻolelo nūpepa, i lawa kūpono ai ka manawa e hoʻopaʻa aku ai i ua mau moʻolelo nūpepa nei. No laila, e kiʻi i kāu puke moʻomanaʻo ponoʻī, a e kākau penei ma loko o laila:

• helu papa ʻia kekahi mau kumumanaʻo āu e hoihoi ai - no nā ʻano moʻolelo like ʻole paha (ka nūhou, ke aloha ʻāina, ka hoʻonanea, ka nīnauele, a pēlā aku)

• wae ʻia hoʻokahi a ʻelua paha kumumanaʻo āu e manaʻo ai he koʻikoʻi loa a i ʻole he kūpono no ka hoʻopuka ʻana i kēia wā nei

• e kākau liʻiliʻi no ua mau manaʻo nei he ʻelua: e wehewehe i ke kumumanaʻo a me kona waiwai; e noʻonoʻo no nā māhele o ka moʻolelo; a e hōʻike lihi mai nō i ke ʻano o kāu moʻolelo ponoʻī e kākau ai - pehea e ʻokoʻa ai kāu, ʻokoʻa hoʻi kā nā hui haʻilono nui o ke ao?

Ma ka papa nō e kamaʻilio ʻia ai kēia mau kumumanaʻo, a hoʻomōhalahala ʻia nō, i mākaukau no ke kākau ʻana i ka moʻolelo no KUH.