Nā Haʻawina 331
6 Kēkēmapa 2023
haku moʻolelo
E pau kēia haʻawina haku moʻolelo i ka lā 6 o Kēkēmapa.
E haku i kāu moʻolelo ponoʻī - he moʻolelo lāhui a i ʻole he moʻolelo nūpepa, me ka hoʻopilipili ʻana i ka hana a nā mea kākau Hawaiʻi o ka wā ma mua.
ka moʻolelo: 1 ʻaoʻao, lele ka laina
ka wehewehe ʻana: 2 ʻaoʻao, lele ka laina
**Ma ka wehewehena, e hōʻike mai nō i ka like a like o kāu moʻolelo i haku ai me nā moʻolelo i heluhelu ʻia ma ka papa - kona mau hiʻohiʻona, nā loina kākau, a me ka pahuhopu hoʻi.
Paʻi ʻia ka pepa a lawe lima ʻia i ka papa i ka Pōʻakolu.
29 Nowemapa 2023
pepa pōkole
Pepa Pōkole #5 - no ka Moʻolelo Nūpepa
Eia hou ka palapala e wehewehe ana i kēia haʻawina, aia ma ʻaneʻi.
Mai poina: 2 paukū o kēia haʻawina
paukū 1: hōʻuluʻulu (summary). mai hoʻokomo i ke kālailai ʻana (analysis)
paukū 2: e hāpai i nīnau i pili i kāu mea i heluhelu ai, a e pane. (hoʻokahi wale nō nīnau o kēia māhele!)
Eia kekahi mau nīnau kūpono:
‘O wai ke anaina o kēia moʻolelo nūpepa?
Pehea i kākoʻo ai ke ʻano o ka ʻōlelo i ka hoʻokō ʻana i ka pahuhopu a ka mea kākau?
Hiki i kēia moʻolelo nūpepa ke aʻo mai iā kākou e pili ana i kona wā i puka ai?
Pehea e like ai a ʻokoʻa ai hoʻi ke ʻano i kākau ʻia ai kēia moʻolelo nūpepa me nā moʻolelo o nā nūpepa ʻōlelo Pelekania o kēia au?
He aha nā mea e Hawaiʻi ai kēia moʻolelo nūpepa?
Ua pili paha kekahi mau manaʻo o nei moʻolelo nūpepa me ka nohona Lāhui o kākou i kēia au nei?
**Lawe lima ʻia ka pepa i ka papa ma ka Pōʻakolu.
27 Nowemapa 2023
he mau moʻolelo nūpepa
No ka Pōʻakahi, e heluhelu ʻoukou a pau i ka moʻolelo ʻo "Ke Aloha Aina: Heaha Ia?" (na Joseph Nāwahī). A laila, e koho i hoʻokahi moʻolelo hou aku e heluhelu ai:
"O Keaha ke Aloha Aina." Ka Malamalama o Hawaii, Ka Lei Rose o Hawaii. 15 ʻApelila 1898.
"Mai Haalele i ka Olelo Makuahine." Kuokoa Home Rula. 22 Malaki, 1907.
Eia kekahi, e hoʻomaka i ka hoʻolālā ʻana i nā haʻawina ʻekolu i koe ma kēia kau:
Pepa Pōkole (Moʻolelo Nūpepa): 29 Nowemapa
Haku #2 (Moʻolelo Lāhui / Moʻolelo Nūpepa): 6 Kēkēmapa
Papahana Kau: 13 Kēkēmapa
22 Nowemapa 2023
pepa pōkole
Pepa Pōkole #4 - no ka Moʻolelo Lāhui
Eia hou ka palapala e wehewehe ana i kēia haʻawina, aia ma ʻaneʻi.
Mai poina: 2 paukū o kēia haʻawina
paukū 1: hōʻuluʻulu (summary). mai hoʻokomo i ke kālailai ʻana (analysis)
paukū 2: e hāpai i nīnau i pili i kāu mea i heluhelu ai, a e pane. (hoʻokahi wale nō nīnau o kēia māhele!)
Eia kekahi mau nīnau kūpono:
He aha nā pahuhopu i kō i kēia moʻolelo?
Ua komo anei kekahi mau hiʻohiʻona o ka moʻolelo kaʻao? Inā pēlā, he aha ka hua o ia ʻano o ka haku ʻana i nei moʻolelo?
Inā paʻi hou ʻia kēia moʻolelo i ka wa nei, he aha kekahi pahuhopu e kō i ia paʻi hou ʻana?
Pehea i mau ai nā hua a me nā hopena o kēia moʻolelo iō kākou nei?
**Lawe lima ʻia ka pepa i ka papa ma ka Pōʻakolu.
20 Nowemapa 2023
no kamehameha
E hoʻopaneʻe ʻia ana ka haʻawina Pepa Pōkole no ka Pōʻakolu. E hoʻomākaukau pono.
No ka Pōʻakahi, e heluhelu i nā ʻaoʻao ʻehā mua o kēia "Moolelo Kaao Hawaii no Kamehameha" - mai ka hoʻomaka ʻana a hiki aku i ka māhele i kapa ʻia "Ko Kamehameha Hooponopono Ana i Kona Aupuni". E noʻonoʻo aku: No ke aha i kapa ʻia ai kēia haʻi moʻolelo ʻana he "moʻolelo kaʻao"?
15 Nowemapa 2023
wehewehe kaila / māmalahoe kānāwai
E hoʻokō aku i ka haʻawina Wehewehe Kaila no ia mea he moʻolelo lāhui, e like me ka hiki. (Eia nō kahi e hoʻākāka hou ai i kēia haʻawina kākau.)
Eia nō hoʻi ka moʻolelo pōkole e heluhelu ai ma mua o ka papa i ka lā ʻāpōpō. E ʻimi aku nō i nā māhele ʻano pohihihi, paʻakikī o ka maopopo ʻana, a me nā manaʻo nui a hoihoi o loko:
13 Nowemapa 2023
kā Poepoe Moolelo Hawaii Kahiko
E nānā pū kākou i kēia mau māhele o ka Moolelo Hawaii Kahiko a J.M. Poepoe i kākau ai. He pili nō i kekahi o nā māhele o kā D. Malo puke i kākau ai, a kākou i kamaʻilio pū ai ma ka papa i hala iho nei.
ka hoʻolauna ʻana i ka moʻolelo: 1 Pepeluali
no ka ʻāina ʻana: 6-13 Pepeluali
no Lalowaia mā (kahi no laila mai paha ʻo Papa me Wākea): 4-13 Iulai
8 Nowemapa 2023
Malo
E heluhelu i nā mokuna mua ʻehā o kā Malo Moolelo Hawaii, a e noʻonoʻo no ia mea he moʻolelo lāhui:
Malo, David. Ka Moʻolelo Hawaiʻi. Malcom Naea Chun, ed. Honolulu: The Folk Press, 1987. pp. 1-7.
6 Nowemapa 2023
haku mele/moʻolelo
Ua hiki mai nō ʻo waena o ke kau, ʻo ia nō ka wā e hoʻokō ai i kekahi haʻawina ʻokoʻa, ʻo ka haku ʻana i mele a i moʻolelo paha. Wehewehe ʻia nō hoʻi kēia haʻawina ma ka ʻolokeʻa papa, ma lalo o ka helu 4: ka haku ʻana.
E haku ana nō ʻoukou i kāu mele ponoʻī (he mele kāhea a i ʻole he mele wahi pana) a i ʻole kāu moʻolelo kaʻao ponoʻī. Hoʻokahi ʻaoʻao ka lōʻihi o kāu mea e haku ai - inā he mele, e haku nō me ka lōʻihi e pono ai ke mele. Inā he moʻolelo, e haku i māhele wale nō ona - mai hoʻokomo i ka moʻolelo kaʻao holoʻokoʻa i loko o ka ʻaoʻao hoʻokahi!
‘O ka māhele ʻelua o kēia haʻawina, he wehewehena ia. Ma ia māhele, e wehewehe ʻoe i kāu mea i haku ai, kona mau hiʻohiʻona, nā manaʻo i loko ona, nā koho āu i hoʻokō ai, a me kona pilina i kona genre kahiko. ‘Elua ʻaoʻao ka lōʻihi o kēia māhele.
Paʻi ʻia kēia haʻawina, a lawe lima ʻia i ka papa i ka lā 6 o Nowemapa.
25 ʻOkakopa 2023
hoʻomaha!
E hoʻomaha iki kākou! ʻAʻohe haʻawina kākau a heluhelu paha. E kau naʻe ka noʻonoʻo i kēia mau nīnau no ka hana keaka ʻo Nā Kau a Hiʻiaka:
Pehea i komo ai ka ʻōlelo hoʻokāʻau, ka ʻōlelo ʻikioma, a me ka ʻōlelo hoihoi i loko o kēia haʻi moʻolelo ʻana?
He mau māhele ʻē aʻe i kākoʻo i ia ʻano hoʻoniua puʻuwai o ke kaʻao?
‘Ike ʻia anei ke komo ʻana mai o ka haku hana keaka i loko o kēia haʻi moʻolelo ʻana?
Ua like a like ka hana keaka me ka moʻolelo i paʻa ma nā nūpepa? Pehea i ʻokoʻa ai?
He ala kūpono kēia e ola hou ai nā moʻolelo Hawaiʻi kahiko?
23 ʻOkakopa 2023
pepa pōkole
Pepa Pōkole #3 - no ka Moʻolelo Kaʻao
Eia hou ka palapala e wehewehe ana i kēia haʻawina, aia ma ʻaneʻi.
E koho i māhele kaʻao a i ʻole i ʻatikala i kākau ʻia no ia mea he kaʻao, a e hoʻokō aku.
Mai poina: 2 paukū o kēia haʻawina, i piha ai ka ʻaoʻao hoʻokahi
paukū 1: hōʻuluʻulu (summary). mai hoʻokomo i ke kālailai ʻana (analysis)
paukū 2: e hāpai i nīnau i pili i kāu mea i heluhelu ai, a e pane. (hoʻokahi wale nō nīnau o kēia māhele!)
Eia kekahi mau nīnau kūpono:
He aha kekahi pahuhopu nui i kō i kēia kaʻao, a pehea i kō ai?
He mau mana ʻokoʻa paha ko kēia moʻolelo kaʻao; inā pēlā, pehea kā Pukui ʻōlelo no ke koʻikoʻi o ka haʻi ʻana me ka pololei?
Loli anei ke ʻano o ka meʻe i loko o kēia kaʻao?
He aha ke ʻano o ko ka meʻe hoa paio a me ko lāua hakakā ʻana?
He haʻawina ko kēia kaʻao? (Inā ʻaʻole, he aha ka pahuhopu i kō iā ia?)
E koho i kekahi ʻano ʻōlelo a analula paha, a e kālailai i kona puka ʻana ma loko o ka moʻolelo kaʻao.
E paʻi nō i ka pepa, a e lawe mai i ka papa i ka Pōʻakahi
18 ʻOkakopa 2023
wehewehe kaila / hiʻiakaikapoliopele
‘Akahi, e hana ʻia ka pepa Wehewehe Kaila no ka Moʻolelo Kaʻao:
½-1 ʻaoʻao
1.5 spacing
e wehewehe mai i nā hua/pahuhopu a me nā hiʻohiʻona o ia mea he moʻolelo kaʻao (ma ka laulā nō)
paʻi ʻia, a lawe ʻia i ka papa i ka Pōʻakolu
**E nānā hoʻi i ka palapala o nā Hemahema Maʻamau, i ʻole e hana hou ai i ka hemahema like!
‘Alua, e heluhelu i ka moʻolelo ʻo Hiʻiakaikapoliopele, no kona launa pū ʻana me Kaʻanahau ma Kailua: