Nā Haʻawina 331

Eia ka haʻawina hope loa o ke kau nei, he Pepa Kālaimanaʻo (essay). ʻElua koho no ka hoʻokō ʻana i kēia pepa:

1. E koho i kekahi mele a moʻolelo paha i heluhelu ʻia i kēia kau, a e kākau no ka hoihoi a me ke koʻikoʻi ona i loko o kona ʻohana ponoʻī, ka nui moʻolelo o ka Hawaiʻi, a me ka lāhui kekahi. (Wehewehe hou ʻia ma ka ʻolokeʻa papa, helu 5.)

2. E koho i hoʻokahi nīnau i hāpai ʻia ma ka hopena o ke kau, a e pane aku. Pili kēia mau nīnau i ka hoʻomau ʻana o kākou i ka haku mele a me ka haku moʻolelo i ke au hou. Aia ma ʻaneʻi nā nīnau; ma ʻaneʻi nā loua o nā mea i lohe ʻia i ka papa aku nei.

Eia ka haʻawina no ka pule hope loa o ka papa, ʻo ia ka Haku #2.

E koho i kekahi ʻano moʻolelo e haku ai: he Moʻolelo Lāhui a i ʻole he Moʻolelo Nūpepa. E haku nō i kāu moʻolelo ponoʻī, me ka hoʻopili ʻana i ke kaila i haku ʻia ai kēia mau moʻolelo i ka wā ma mua.

• ka moʻolelo i haku ʻia: 1 ʻaoʻao piha (lele ka laina)

• ka wehewehe ʻana i kāu moʻolelo: 2 ʻaoʻao (lele ka laina). Ma kēia māhele o ka haʻawina, e hoʻākāka mai i kāu haku ʻana i kāu moʻolelo ponoʻī, kona mau hiʻohiʻona, a me ka pahuhopu ona. E hōʻike pū mai nō i kona pilina me nā moʻolelo kahiko o kona ʻohana like.

Waiho ʻia kēia haʻawina i loko o kāu Faila Haumāna ma mua o ka papa i ka Pōʻakolu.

E pau ka Pepa Pōkole hope loa i kēia lā, a waiho ʻia akula i loko o ka Faila Haumāna. Mai poina ka hāpai ʻana i nīnau i pili i kāu mea i heluhelu ai no kēia wahi pepa.

Eia kekahi, e kau nō ka manaʻo i kāu mea e haku ai no kēia māhele o ke kau - he moʻolelo lāhui paha, a he moʻolelo nūpepa paha. ʻO ka lā 7 o Kēkēmapa ka lā e paʻa ai ia haʻawina Haku #2, a waiho ʻia i loko o ka Faila Haumāna.

E heluhelu i nā moʻolelo nūpepa ʻelua i kākau ʻia no ka ʻōlelo Hawaiʻi, ʻo ia hoʻi:

• "Mai Haalele i ka Olelo Makuahine." Kuokoa Home Rula. 22 Malaki, 1907.

• "Olelo Hawaii." Ka Puuhonua o na Hawaii. 26 Ianuari 1917.

A e nalu iho: he aha nā mea i hopohopo ai nā mea kākau o kēia mau moʻolelo? I ko lāua manaʻo, pehea e pono ai? Pehea i hōʻike ʻia ai kēia mau manaʻo i loko o nā moʻolelo ʻelua?

E waiho aku i ka Wehewehe Kaila i kāu Faila Haumāna ma mua o ka papa i ka Pōʻakolu. He haʻawina kēia no ka māhele Moʻolelo Lāhui, mai loko mai hoʻi o nā moʻolelo ʻelua a kākou i heluhelu iho nei. (A me nā moʻolelo ʻē aʻe inā ua heluhelu nō ʻoe.)

Eia hou ka haʻawina:

• ½ - 1 ʻaoʻao

• lele ka laina

• e hoʻākāka i nā pahuhopu a me nā hiʻohiʻona laulā o kēia ʻohana moʻolelo

I ka Pōʻakolu, e kamaʻilio ana kākou no kekahi mau māhele o kā Kamakau moʻolelo no Kauikeaouli a me kā Piʻilani moʻolelo no kāna kāne, no Kaluaikoʻolau.

I mea e hoʻokūkū ai me kā Malo Moʻolelo Hawaiʻi, e heluhelu i nā pukana mua o kā Poepoe Moʻolelo Hawaiʻi Kahiko. No ka Pōʻakolu, e heluhelu wale nō i nā māhele i puka mai ka lā 1-7 o Pepeluali, 1906.

• Poepoe, Joseph Mokuʻōhai. "Moolelo Hawaii Kahiko." Ka Naʻi Aupuni, 1 Pepeluali 1906 - 29 Nowemapa 1906.

He nani maoli nō ka hui ʻana o kākou ma Uluhaimalama. Mahalo i ka poʻe nānā i haku a wehewehe mai i nā mele aloha no ka ʻāina me ka lāhui. Ua kani mai nā leo kamaʻāina, ua pā mai hoʻi ka makani aheahe, ua pōmaikaʻi nō kākou i ke kilikilihune ʻana mai a ka ua. He nani nō.

Eia hoʻi kākou ke hoʻomaka nei i ka mokuna o nā moʻolelo o ka lāhui Hawaiʻi. ʻO kā Davida Malo ka mea mua a kākou e nānā pū ai, no laila, e heluhelu nō i nā mokuna 1-4 o kāna puke ‘o Ka Moolelo Hawaii. Aia nō ke waiho lā ma ka ʻaoʻao Mokuna IV o nei paena pūnaewele.

E hui nō ka papa i ka Pōʻakahi, lā 31 o ʻOkakopa. ʻO kēia haʻawina naʻe, ʻo ka lā 2 o Nowemapa ka palena pau.

Haku #1

E koho i kekahi ʻohana mele a moʻolelo paha a kākou i heluhelu iho nei: Mele Lāhui (mai ka BML mai), Mele Kiaʻi (e like me nā mele no Maunakea), Moʻolelo Kaʻao. A e haku i kāu mea ponoʻī ma ia kaila like.

**Inā makemake ʻoe e hoʻomau i ka Moʻolelo Kaʻao i hoʻomaka ʻia ma ka papa, ua hiki. Akā, e hoʻomau nō ʻoe i ia moʻolelo, adding at least one additional page.

• 1 ʻaoʻao: ka mea hou i haku ʻia

• 2 ʻaoʻao (lele ka laina): kāu wehewehena. (Explain how you composed this mea hou, what choices you made in composing, and how it reflects older texts in its genre.) He ʻano wehewehe kaila kēia no kāu mea ponoʻī i haku ai.

**Ma ka lā 2 o Nowemapa, e hui ana ka papa ma Uluhaimalama. Inā he hiki ʻole, ma ka Zui e pili mai ai!

Nanea wale aku nei nō i ka nānā hana keaka me ka hoʻolohe ʻana i ka moʻolelo kaulana o Hiʻiakaikapoliopele. E hoʻomau aku nō kākou i ia nanea ma ka Pōʻakolu. I mākaukau, e heluhelu mai nō i ka māhele mua o lalo nei, he māhele nō ia no ka hakakā ʻana o Hiʻiaka me nā moʻo o Kauaʻi. Inā he manawa a he hoihoi i koe iā ʻoe, e hoʻomau paha i ka heluhelu ʻana i nā māhele ʻē aʻe.

• Kuokoa Home Rula. 17 Kēkēmapa 1909.

• Kuokoa Home Rula. 24 Kēkēmapa 1909.

• Kuokoa Home Rula. 31 Kēkēmapa 1909.

Eia kekahi, e hoʻomaka paha i ka noʻonoʻo me ke kākau ʻana i ka haʻawina Haku #1. ʻO ka lā 2 o Nowemapa ka palena pau. Inā he nīnau kāu no ia haʻawina, e hāpai mai nō!

Hoʻokahi pule i koe no kēia mokuna, akā ʻo ka Pōʻakahi ka lā e pau ai ka Pepa Pōkole. Eia hou ka haʻawina:

Pepa Pōkole: Nā Moʻolelo Kaʻao

Like loa kēia me nā Pepa Pōkole i hana mua ʻia. No laila, e heluhelu hou i kaʻu mau manaʻo i waiho ai ma kāu mau pepa i hana ai. Eia ka hana: e koho i hoʻokahi mea a kākou i heluhelu ai, a laila e kākau i kāu pepa, he hoʻokahi ʻaoʻao piha, penei:

• Paukū 1: e hōʻuluʻulu (summarize) i ka mea āu i heluhelu ai. *Mai hoʻokomo i kou manaʻo ma kēia māhele!

• Paukū 2: e hāpai i kekahi nīnau e pili ana i ka mea i heluhelu ʻia, a e pane aku nō.

Eia kekahi mau laʻana o ka nīnau i hiki ke hāpai ʻia:

• Wahi a kekahi, he fairytale Hawaiʻi ke kaʻao. ʻO kēia mea āu i heluhelu ai, pehea ia i like ai me ia mea he fairytale? Pehea i ʻokoʻa ai?

• He haʻawina anei ko kēia kaʻao? He aha ia, a pehea i aʻo ʻia ai?

• Wahi a Pukui, ʻo ka pololei ka mea nui o ka haʻi moʻolelo ʻana. He aha nā mea i paʻa loa i kēia moʻolelo, e aʻo ʻia me ka pololei loa? He aha ka waiwai o ka hoʻopaʻa ʻia ʻana?

• Wahi a Poepoe mā, he mau moʻolelo hoʻohialaʻai nā kaʻao. Pehea i hoʻoulu ʻia ai ka hoihoi o kēia moʻolelo kaʻao ma o ke ʻano i haʻi ʻia ai?

• He kupuʻeu anei ka meʻe o kēia kaʻao? No ke aha ʻoe e manaʻo nei pēlā?

Hoʻokahi wale nō ʻaoʻao o kēia pepa. ʻElua ona paukū. Lālani: 1.5 spacing. Waiho ʻia i kāu Faila Haumāna ma mua o ka papa i ka Pōʻakahi.

Mahalo i ka wiwoʻole i ka haku hou ʻana i ke kaʻao - e hoʻomau ʻia ana nō ma nā hui liʻiliʻi i ka Pōʻakolu!

Eia ka haʻawina, ʻo ka Wehewehe Kaila no ka Moʻolelo Kaʻao:

• ½ - 1 ʻaoʻao (lele ka laina)

• He aha nā hiʻohiʻona o kēia ʻohana moʻolelo ʻo ke Kaʻao?

• He aha nā pahuhopu ona? No ke aha e haʻi hou ʻia ai?

• Waiho ʻia ma kāu Faila Haumāna ma mua o ka papa i ka Pōʻakolu.

Aia nō hoʻi ka mind map i hana ʻia i kēia lā ma kā kākou Google Drive. E nānā paha ka maka.

Eia kākou ke hoʻomau nei i ka ʻimina i nā hiʻohiʻona o ia mea he moʻolelo kaʻao. No ka Pōʻakahi, e heluhelu i ka hoʻomaka ʻana o kēia mau kaʻao ʻehā:

• Hiʻiakaikapoliopele

• Kawelo

• Mākālei

• Lāʻieikawai

A laila e noʻonoʻo, a e hoʻomākaukau no ke kamaʻilio pū ʻana i kēia mau mea:

• Pehea ke ʻano o ka meʻe o ia moʻolelo?

• He aha nā mea koʻikoʻi e hoʻopaʻa mua ai i ka hoʻomaka ʻana o ka moʻolelo?

• Kū ʻokoʻa anei kekahi o kēia mau moʻolelo, a like ʻole paha me nā mea ʻē aʻe?

• Pehea e ʻike ʻia ai ke ʻano o ka moʻolelo holoʻokoʻa i loko o kēia mau paukū mua?