Nā Haʻawina 331

DD126CD9-9F56-4482-9340-8724290E9284_1_105_c_edited.jpg

3 & 5 ʻOkakopa

Wehewehe Kaila - Nā Mele Kiaʻi

Maikaʻi wale ke kamaʻilio ma ka papa a me ka nānā hou ʻana i ke mele a Chock i haku ai. Ua waiho ʻia ka palapala aʻu i māka ai ma ka faila Mele Kiaʻi - resources ma loko o kā kākou Waihona Google.


No ka Pōʻakahi, e kākau i kāu Wehewehe Kaila no nā Mele Kiaʻi. Ma mua o ke kākau ʻana, e nānā pono i kekahi mau mele ʻē aʻe ma loko o ka pūʻulu mele, i mea e hōʻoia ai i ka loaʻa ʻana o nā hiʻohiʻona hou ma laila. A laila, e kākau nō i kēia pepa:

  • ½ - 1 ʻaoʻao

  • hoʻākāka ʻia nā pahuhopu o kēia ʻohana mele

  • kuhi ʻia kekahi o nā hiʻohiʻona maʻamau ona

E waiho aku nō i kāu Faila Haumāna ma mua o ka papa i ka Pōʻakahi.


Eia nō hoʻi kekahi mau mele hou aku no Maunakea; na Kumu Kaʻiu e alakaʻi i ka hoʻomaopopo a me ke kālailai i kēia pule. E heluhelu nō ma mua o ka naue ʻana mai i ka Zumi papa.

28 Kepakemapa

Goodyear-Kaʻōpua; he mau Mele Kiaʻi

Eia nō kākou ke hoʻomaka nei i ka mokuna no nā Mele Kiaʻi, i haku ʻia no Maunakea. E heluhelu mai i kēia moʻolelo pōkole a Noelani Goodyear-Kaʻōpua i kākau ai:

Goodyear-Kaʻōpua, Noelani a me Yvonne Mahelona. "Protecting Maunakea Is a Mission Grounded in Tradition." Zora, 5 Kepakemapa 2019.


A, e heluhelu hoʻi i kēia mau mele ʻekolu i paʻa ma ka palapala Nā Mele Kiaʻi:

  • He Lei Wahine

  • Lei ana Maunakea i ka ʻOhu

  • Aloha ʻĀina ʻOiaʻiʻo

26 Kepakemapa

Pepa Pōkole (BML)

Eia ka haʻawina "Pepa Pōkole" no kēia mokuna o ka papa.


E koho i hoʻokahi mea a kākou i heluhelu pū ai no ka mokuna Buke Mele Lahui. He mele paha ia, he ʻatikala paha, he moʻolelo nūpepa paha. A laila, e kākau ana ʻoe i pepa hoʻokahi ʻaoʻao (1.5 lālani). ʻAʻole ma lalo o ka hoʻokahi ʻaoʻao, ʻaʻole nō hoʻi ma luna aʻe. Eia hoʻi, ‘elua paukū o kēia pepa:

  • paukū 1: e hōʻuluʻulu (summarize) i ka mea āu i heluhelu ai. Mai hoʻokomo i kou mau manaʻo ponoī ma kēia paukū.

  • paukū 2: e hāpai i kekahi nīnau, a laila e pane i ka nīnau.

Eia kekahi mau laʻana o ka nīnau maikaʻi:

  • Ma kēia mau mele, loaʻa ka leo kūamuamu, ka leo hoʻohanohano, ka leo kalokalo, a pēlā aku. No ke aha i loaʻa ai kēia mau leo ʻokoʻa i loko o ka ʻohana mele hoʻokahi?

  • ‘Ike ʻia ka ʻōlelo hoʻokamani i kekahi mau mele (e laʻa: ua ʻike i ka "nani" o ke kapitala). He aha kekahi hua i loaʻa ma muli o ka haku ʻana i ke mele pēlā?

  • No hea mai ka mana o kēia mau mele?

  • Kākau ʻia e Testa ma ka ʻōlelo mua o kēia puke, makemake ʻo ia e lawelawe ʻia ka Buke Mele Lahui e ka lehulehu. He aha paha kekahi kumu āna i kākau ai pēlā?

Aia nō hoʻi ma ka ʻaoʻao Nā Pono Papa he wehewehe hou ʻana i kēia haʻawina. ʻIke ʻia ma laila, he 1.5 spacing ka mea e pono ai. Waiho ʻia kāu pepa i ka faila "Pepa Pōkole" ma kāu Faila Haumāna ponoʻī ma mua o ka papa i ka Pōʻakahi.


Eia hoʻi, e waiho i nā paukū mele i haku ʻia i kēia lā ma ka faila Google a ka papa. Mahalo!

21 Kepakemapa

Basham; Puʻu Kaimukī

I mea e paʻa pono ai ka moʻolelo o ke mele "Hoonanea a Hookuene Liliu," e heluhelu (hou) i kēia māhele o kā Leilani Basham palapala noiʻi laeʻula:


E hui nō hoʻi ka papa i Puʻu Kaimukī i ka Pōʻakolu. Aia ma Ocean View Drive kahi e komo ai. Ke ʻoluʻolu, e kau pū ma nā kaʻa (carpool) i ʻole e paʻa ai ke alanui i ko kākou poʻe kaʻa!

19 Kepakemapa 2022

Wehewehe Kaila

Eia nō kāu haʻawina kākau mua no ka papa nei, he Wehewehe Kaila.


Ka lōʻihi: ½ ʻaoʻao a i ka ʻaoʻao piha (lele ka laina)

E wehewehe mai i kēia mau mea i pili i kēia ʻohana mele ʻo nā mele mai ka Buke Mele Lahui mai:

  • ko lākou mau pahuhopu

  • nā hiʻohiʻona o lākou i ʻike pinepine ʻia


Waiho ʻia kāu pepa ma ka Faila Haumana i ka waihona Google a kākou. E loaʻa mai nō ma mua o ka papa i ka Pōʻakahi.


Eia hou, ke manaʻo nei au e hui kino kākou i kēia Pōʻakolu aʻe. Ke ʻoluʻolu, e hoʻopihapiha i kēia Google Form i hiki iaʻu ke hoʻolālā pono.

14 Kepakemapa 2022

Stillman, Hoʻolulu, Hoʻohui

Mau nō kākou ma ka nānā ʻana i kēia mau mele lāhui. No ka Pōʻakolu, e heluhelu i kēia mau mele ʻelua, me ka noʻonoʻo ʻana no ka ‘okoʻa o ko lāua leo:


A e heluhelu pū i kā Amy Stillman pepa no ke ʻano o kēia mau mele:

Stillman, Amy Kuʻuleialoha. "History Reinterpreted in Song: The Case of the Hawaiian Counterrevolution." The Hawaiian Journal of History, 23 (1989) pp. 1-30.

12 Kepakemapa 2022

Buke Mele Lāhui

Aloha nui kākou!

Auē ka huikau o nei wahi kumu!! ʻAkahi au a ʻike, ʻo ka lā 19 o Kepakemapa ka lā e hana ai i ka Wehewehe Kaila mua... ʻaʻole ma ka Pōʻakahi aʻe nei!! Auē, e huikala mai iaʻu, ua haʻalele ʻia au e ka noʻonoʻo pono.


Akā, ʻaʻole ʻokoʻa loa ka haʻawina no kēia Pōʻakahi. E heluhelu hou nō i nā mele a kākou i nānā ai ma ka papa (aia ma ʻaneʻi kā kākou mau noka). A laila, e heluhelu pono i nā mele ʻelua i koe, i ʻike aku i nā hiʻohiʻona like o kēia ʻano o ke mele (the characteristics of this mele genre). ʻO ia kā kākou e kamaʻilio ai ma ka Pōʻakahi.


No laila, ‘aʻohe haʻawina kākau o kēia pule. Whew! Ua pakele aku nō!!

7 Kepakemapa 2022

Buke Mele Lāhui: Olelo Hoakaaka & 4 Mele Lāhui

Eia ka haʻawina heluhelu no ka Pōʻakolu. (ʻAʻohe kula i ka Pōʻakahi.)


Testa, F.J. "Olelo Hoakaka." Buke Mele Lahui. Honolulu: ka Halepai Makaainana, 1895. pp. iii-vi. (ʻO ka hoʻolauna kēia o ka puke mele i paʻi ʻia i ka makahiki like o ke Kaua Kuloko: Counterrevolution.)


A me kēia mau mele lāhui ʻehā mai loko mai o ka puke:

31 ʻAukake 2022

Poepoe: no Lalo-i-Mehani

Eia kekahi māhele pōkole o kā Poepoe "Moolelo Hawaii Kahiko" i hoʻopuka ʻia i ka nūpepa ʻo Ka Na'i Aupuni i ka makahiki 1906. Ma loko nei, paio ʻo Poepoe no kāna mea i ʻike ai, ʻo ia hoʻi, ma Hawaiʻi nei nō i noho ai ʻo Papa (Haumea) a me Wākea. E heluhelu aku, a e lawe mai i nā nīnau i ka papa ma ka Pōʻakolu.



**Eia kekahi, ua kiloi ʻia ka hoʻākāka kiʻa pepeke ma ka faila Resources ma Laulima. E kiʻi aku nō!

29 ʻAukake 2022

Duckworth, Charlot

Mahalo iā ʻoukou i ka hāpai ʻana i mau manaʻo a nīnau koʻikoʻi i ka papa o nei lā. Eia ka haʻawina no kēia Pōʻakahi aʻe. Mai loko mai lāua o ka ʻaoʻao Hoʻokahua o kēia paena pūnaewele nei.

24 Aukake 2022

Basham (Ka Lāhui Hawaiʻi)

Basham, Leilani. Ka Lāhui Hawaiʻi: He Moʻolelo, He ʻĀina, He Loina, a He Ea Kākou. Hulili, vol. 6.

  • E heluhelu i nā ʻaoʻao 37-45 o kēia palapala. Aia ma ka ʻaoʻao Nā Kumu ʻIke, ma lalo o Hoʻokahua.