Nā Haʻawina 601
4 Kēkēmapa 2023
ka hoʻolālā ʻaha iki
Eia nā mea ‘ekolu e hoʻomākaukau ai ma mua o ka papa i ka Pōʻakahi:
E kono aku i ka mea e lilo ana i luna hoʻomalu no kāu pānela o Ka Hale a ke Ehu. (me ka CC ʻana mai iaʻu kekahi)
E paʻa ka inoa o ka pānela a me kekahi paukū wehewehena, a waiho ʻia i loko o kēia faila Google.
E paʻa kāu hōʻuluʻulu noiʻi ponoʻī.
Ma ka Pōʻakolu, e hoʻopaʻa pono ʻia ana ke kaʻina hana o kēia ʻaha kūkā iki a me nā mea a pau ona. A e kamaʻilio nui kākou no ke ʻano o ka pepa noiʻi, ka mea e pau ana i ka lā 15 o Kēkēmapa, hola 4:00 o ka ʻauinalā.
27 Nowemapa 2023
Krug / ka hoʻolālā noiʻi
E kamaʻilio ʻia nō kā Kalehua Krug moʻolelo! E kau ka manaʻo i ke ʻano o kona kūkulu manaʻo ʻana a me ka hoʻokō ʻana i kāna pahuhopu. Eia hoʻi, e hoʻoponopono (a i ʻole e kākau!) i kau Hōʻuluʻulu Noiʻi, a waiho aku i loko o kēia faila.
A, ke ʻoluʻolu, e hoʻopihapiha i kēia Palapala Google, i hoʻolālā pono ʻia ka ʻAha Kūkā Liʻi a kākou.
20 Nowemapa 2023
Hōʻuluʻulu Noiʻi / Krug
Eia nō ka hopena o ke kau ke holo kikī maila! I mākaukau, e haku ʻoukou i hōʻuluʻulu noiʻi (abstract) no kāu Pepa Noiʻi o kēia kau. He paukū pōkole kēia (350 huaʻōlelo a emi mai) no ka hōʻākāka ʻana i kēia mau mea nui o kāu pepa:
ka nīnau a pilikia paha āu e noiʻi ana
nā kumu ʻike āu e kālailai ai i loaʻa ke aʻo
ka pahuhopu nui o kāu pepa
Wehewehe piha ʻia kēia ʻano mea ma ʻaneʻi, me ka hoʻolako pū ʻana i mau kumu hoʻohalike.
Hana ʻia kāu kā mua o kēia hōʻuluʻulu noiʻi, a waiho ʻia ma ka faila nei ma mua o ka hoʻomaka ʻana o ka papa. A laila, e nānā pū kākou a hoʻoponopono aku.
Inā lawa ka manawa, e kamaʻilio nō hoʻi kākou no kēia moʻolelo a Kalehua Krug i kākau ai:
13 Nowemapa 2023
Pepa Liʻiliʻi
‘O ka lā kēia e pau ai ka Pepa Liʻiliʻi ʻelua me ka haʻi ʻōlelo pū kekahi. Ma kēia hanana, e hōʻuluʻulu i ka puke kākoʻo āu i heluhelu ai, a e hoʻākāka mai i kekahi mau pilina o ia puke me nā mea e kamaʻilio ʻia nei ma ka papa.
Ma ʻaneʻi e waiho ai i ka pepa, ma mua hoʻi o ka hui ʻana i ka papa ma ka Pōʻakahi.
6 Nowemapa 2023
hoʻokō pono
E nānā pono nō kākou i ka hoʻopāpā moʻokūʻauhau a me ke kumuhana no ka pepa noiʻi o nei kau. Inā ʻaʻole i hana mua ʻia, e waiho i kāu wehewehena i ke kumuhana pepa noiʻi ma ka faila nei.
Mai poina: i kēia pule aʻe e pau ai ka Pepa Liʻiliʻi ʻelua a e mālama ʻia nō nā haʻi ʻōlelo no ua pepa nei.
30 ʻOkakopa 2023
Hoʻopāpā Kūʻauhau / Pepa Noiʻi
Eia nā hoʻopāpā moʻokūʻauhau e heluhelu ʻia i kēia pule:
E kālele ka Hui A i nā leka o ka māhele mua; na ka Hui E e nānā pono i ka hoʻopapā no ke kahu hānai. ʻAʻohe pepa Kālai Manaʻo o kēia pule; e hoʻomākaukau nō naʻe i kou mau manaʻo ponoʻī a me nā nīnau kekahi, i ʻole e hāʻule pahū ai ko kākou hola kamakamaʻilio!
Eia kekahi, e hana i wehewehena laulā i kāu papahana noiʻi no kēia kau a me kēia papa. Aia iā ʻoe ke ʻano - e kākau ʻia paha me he mea lā ʻo ia ana ka ʻōlelo mua o ka pepa; a i ʻole e pane wale nō i kēia mau nīnau; a i ʻole e hoʻākāka mai i nā manaʻo i paʻa i loko ou a me nā mea āu e kānalua nei. E noʻonoʻo ʻia naʻe nā nīnau o lalo nei, a e waiho ʻia kāu wehewehena i kēia faila ma mua o ka hui ʻana o ka papa. Inā maopopo iā ʻoe kekahi mau kumuʻike i pili i ua kumuhana nei, e helu papa ʻia ma ka palapala like.
23 ʻOkakopa 2023
"Kamehameha I: Ka Na-i Aupuni o Hawaii"
E heluhelu ʻia nō kēia moʻolelo i paʻi ʻia ma ka nūpepa ʻo Ka Na'i Aupuni:
Ka Moolelo o Kamehameha I, Ka Naʻi Aupuni o Hawaii Nei.
Na ka Hui E ke Kālai Manaʻo - waiho ʻia ma kēia faila. Na ka Hui A hoʻi ka hoʻokamaʻilio.
Eia kekahi, e hoʻomaka i ka hoʻolālā ʻana i kāu pepa noiʻi e kākau ai no ka hopena o ke kau. Aia nō iā ʻoe ke kumumanaʻo - he nīnau paha i hāpai ʻia i loko o kekahi papa, he nīnau paha no ka pilina ʻōlelo, he māhele paha no kāu papahana laeoʻo, he manaʻo paha i pili i ia mea he literature Hawaiʻi, a pēlā aku nō. E nalu iho, a hele mai i ka papa me kekahi mau manaʻo a koho paha.
16 ʻOkakopa 2023
Ka Ipu Makani a Laʻamaomao
‘Oiai ua hoʻokō ʻia ka heluhelu me ke kamaʻilio no Hiʻiaka, ua koho ʻia kēia i moʻolelo e heluhelu ai i kēia pule. Ua paʻa nō i ka puke - e ʻimi ʻia ma ka hale waihona puke. A i ‘ole, e kiʻi aku i ka pdf ma ʻaneʻi. (Mahalo e Kaʻimi!!)
Kālai Manaʻo
Na ka Hui A ke kākau pepa; na ka Hui E ka hoʻomākaukau nīnau. Eia nō ka faila e waiho ʻia ai ka pepa.
9 ʻOkakopa 2023
Wehewehe Mele
‘O ka lā kēia e hoʻokō ai i ka Pepa Liʻiliʻi mua a me ona haʻi ʻōlelo.
No ka pepa:
8-10 ʻaoʻao, lele ka laina
wehewehe ʻia kāu mele i koho aku nei, e like me ka mea e pono ai kāu pahuhopu (hoʻākāka i nā lālani pākahi; haʻi hou i ka moʻolelo o ia mele; na ke mele e aʻo mai i kekahi haʻawina; a pēlā aku)
waiho ʻia i kēia faila i ka pō ma mua o ka hui ʻana o ka papa
No ka haʻi ʻōlelo:
10-15 minuke
he māhele hōʻikeʻike (he mana kuhi, he kiʻi, he palapala ʻāina paha, a me nā hua ʻōlelo o ke mele)
2 ʻOkakopa 2023
"Hiiakaikapoliopele"
No ka moʻolelo ʻo Hiʻiakaikapoliopele, e heluhelu ʻia kā Hoʻoulumāhiehie i kākau aku ai. Ua paʻi ʻia i ka puke ma lalo o Puakea Nogelmeier a me Awaiāulu, paʻi ʻia hoʻi i ka nūpepa ʻo Ka Na'i Aupuni i nā makahiki 1905-06.
E heluhelu kākou a pau i ka māhele mua (a hiki i ko Hiʻiaka haʻalele ʻana iā Halemaʻumaʻu) a me ka māhele hope (mai ka wā i wāwahi ai ʻo Hiʻiaka i nā papa honua o Halemaʻumaʻu a hiki i ka hopena). A, e koho kēlā me kēia haumāna i māhele o waena e heluhelu ai a e haʻi hou mai ai i ka papa i ka lā 2.
Na ka Hui E ke Kālai Manaʻo - waiho ʻia i kēia faila ma ka pō Lāpule. Na ka Hui A hoʻi ka heluhelu ʻana i ia mau pepa a me ka hāpai ʻana i mau manaʻo e hoʻoulu ai i ke kamaʻilio pū.
**Eia kekahi, mai poina ka hoʻomaka ʻana i kāu pepa Wehewehe Mele. ʻO ka lā 9 o ʻOkakopa ka palena pau a me ka lā haʻi ʻōlelo!
25 Kepakemapa 2023
"Ka Moolelo Hawaii Kahiko" / he mele e wehewehe ai
Eia ka mea e heluhelu ai no ka Pōʻakahi:
Poepoe, Joseph Mokuʻōhai. Ka Moolelo Hawaii Kahiko.
Na ka Hui A e hana i ke Kālai Manaʻo - a waiho ʻia i loko o kēia Faila Google. Na ka Hui E e hoʻomākaukau i mau nīnau a manaʻo no ka pane ʻana i ua mau pepa nei, a me ka hoʻoulu ʻana i ke kamaʻilio ma ka papa.
Eia hoʻi, ke huli aʻe nei ka maka i ia mea he Moʻolelo Hawaiʻi; mau nō naʻe ka maliu ʻana i nā Mele. E koho i mele āu e wehewehe ai no ka Pepa Liʻiliʻi mua. Lawe ʻia maila kekahi mau koho i ka Pōʻakahi (a i ʻole ma mua iho, ma o ka leka uila), a paʻa nō i ia papa.
11 Kepakemapa 2023
"He Mele Pule" / Kālai Manaʻo 1E
‘Aʻole e hui ka papa i ka lā 4 o Kepakemapa - he lā nui ia. A hoʻokuʻu ʻia ka papa i ka lā 11 - he wā nui ia no koʻu ʻohana. E makaʻala i kaʻu leka uila, a loaʻa kekahi hola ʻokoʻa e hui ai kākou. Mahalo i ka hoʻomanawanui ʻana mai!
Eia ka moʻolelo wehewehe mele no kēia (mau) pule:
Theodore Kelsey. "He Mele Pule no na Waa a Kana." Ke Alakai o Hawaii.
Na ka hui E ke Kālai Manaʻo. Waiho ʻia ma kēia Faila Google ma mua o ke ao ʻana aʻe o ka lā 11 o Kepakemapa. ʻO ka hui A hoʻi, na ʻoukou e hoʻomākaukau i mau nīnau a manaʻo e hāpai ai i ka papa, i ʻono ai ke kolekole ke hui kākou.
28 ʻAukake 2023
"He Mele no Kamehameha V." / Kālai Manaʻo 1A
Eia nō ka moʻolelo e heluhelu ai i kēia pule:
"He Mele no Kamehameha V." Ke Alakai o Hawaii.
Na ka Hui A e hana i ke Kālai Manaʻo mua. ʻImi ʻia kekahi paukū koʻikoʻi a hoihoi paha o nei moʻomoʻolelo; kikokiko hou ʻia a kālailai ʻia nō hoʻi. Aia nō ma kēia ʻaoʻao o ka paena pūnaewele nei kekahi mau nīnau e kōkua aku i kēia ʻano o ka noʻonoʻo a me ke kākau. Kikokiko ʻia kāu pepa e like me ka mea i wehewehe ʻia ma ka ʻolokeʻa papa, a waiho ʻia ma ka faila "Kālai Manaʻo" o kā kākou Waihona Google. ʻO ka pō Lāpule (27 ʻAukake) ka palena pau.
Na ka Hui E nō e hoʻomākaukau i mau manaʻo e hāpai ai i loko o ka papa, i ka wā a kākou e kamaʻilio ai no kēia moʻolelo wehewehe mele. E heluhelu i nā pepa i kākau ʻia e nā hoa papa a me ka palapala "He Mele no Kamehameha V." A lilo ia i kahua no kou kūkulu manaʻo ʻana, a me ka hāpai ʻana paha i mau nīnau hou aku - no ka papa a i ʻole no ka haumāna nāna i kākau i ka pepa.